Улаанбаатар
Самбо бөхийн +100 кг-д Д.Пүрэвдорж дэлхийн аварга болов
МОНГОЛЫН МЭДЭЭ | СПОРТ
Улаанбаатар /МОНЦАМЭ/. БНСУ-ын Чёнжү хотноо "Чёнжү-2019" самбо бөхийн дэлхийн аварга шалгаруулах тэмцээний эрэгтэйчүүдийн +100 кг-д Дамдинсүрэнгийн Пүрэвдорж дэлхийн аварга болов.
Самбо бөхийн төрлөөр хамгийн хүнд жинд алтан медаль хүртсэн Монгол Улсын 2 дахь тамирчин боллоо. Өмнө нь 1989 онд Б.Бат-Эрдэнэ дэлхийн аварга болж байжээ. БНСУ-д энэ сарын 8-10-нд болсон самбо бөхийн ДАШТ-ий шагналын сан 216 мянган ам.доллар байсан юм.
Энэ удаагийн тэмцээнд багийн дүнгээр ОХУ тэргүүлж, Монголын болон Украины шигшээ баг 2, 3 дугаар байрт шалгарлаа. Тодруулбал, ОХУ 20 алт, 1 мөнгө, 4 хүрэл, Монгол 2 алт, 1 мөнгө, 8 хүрэл, Украин 2 алт, 4 хүрэл, Гүрж 1 алт, 5 мөнгө, 5 хүрэл, Узбекистан 1 алт, 3 мөнгө, 3 хүрэл медаль тус тус хүртжээ. Тус тэмцээнд Монгол Улсаас самбо бөхийн эрэгтэй, эмэгтэй болон байлдааны самбогийн төрөлд тус бүр есөн тамирчин нийт 27 тамирчин хүч, ур чадвараа сорьсон юм.
