АНУ “Huawei” компанийн хоригийг дахин хойшлуулжээ

Дэлхийд | Эдийн Засаг
khulan@montsame.gov.mn
2019-08-20 10:02:42

ВАШИНГТОН. /BBC/. БНХАУ-ын харилцаа холбооны технологийн “Huawei” компанийн эсрэг авсан хориг арга хэмжээний хэрэгжиж эхлэх хугацааг дахин 90 хоногоор хойшлууллаа гэж АНУ-ын Худалдааны сайд Уилбур Росс мэдэгджээ.


АНУ-ын засаг захиргаа үндэсний аюулгүй байдлын асуудлуудтай холбоотой шалтгаанаар АНУ-ын компаниудтай тусгай зөвшөөрөлгүйгээр бизнесийн үйл ажиллагаа явуулахыг хориглосон хар жагсаалтад Huawei” компанийг өнгөрсөн тавдугаар сард оруулсан юм. Үүний дараа уг хоригийн хугацааг хойшлуулах шийдвэрийг гаргасан нь даваа гарагт дууссан байна.


Хэдийгээр АНУ "Huawei" компанийн эсрэг хоригийн хэрэгжиж эхлэх хугацааг дахин хойшлуулсан боловч “Huawei” компанитай холбоотой 46 байгууллагыг АНУ-тай худалдаа хийхийг хориглосон фирмүүдийн хар жагсаалтад нэмж оруулжээ.


У.Россын мэдэгдсэнээр, АНУ-ын хэрэглэгчдийн эрх ашгийг хамгаалах зорилгоор хоригийн хугацааг хойшлуулах шийдвэрийг гаргасан ажээ. Ингэснээр “Huawei” компанийг АНУ-ын компаниудтай өрнүүлж буй бизнесийн үйл ажиллагаагаа хумих хугацаа олгож буйг тэрбээр онцолсон байна.


АНУ-ын засаг захиргааны дээрх мэдэгдлийн хариуд хар жагсаалтад илүү олон байгууллагыг нэмж оруулсныг эсэргүүцэж буйгаа “Huawei” компанийн зүгээс илэрхийлээд, уг шийдвэрийг улс төрийн сэдэлтэй байж магадгүй гэж мэдэгджээ. Өнөөдрийн шийдвэр манай компанийн бизнесийн үйл ажиллагаанд урьдынхтай нэгэн адил дорвитой нөлөө үзүүлж чадахгүй гэж “Huawei” компанийн мэдэгдэлд дурджээ. 

Холбоотой мэдээ