Улаанбаатар
Төгөлдөр хуурч С.Саянцэцэг Боловсролын тэргүүний ажилтан болов
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. БСШУС-ын сайд Ё.Баатарбилэг Монгол Улсын консерваторийн төгөлдөр хуурын багш С.Саянцэцэгт Боловсролын тэргүүний ажилтан тэмдгийг гардуулан өглөө.
С.Саянцэцэг багш салбарын сайдаасаа шагнал гардах үеэрээ, “Дэлхийн хэмжээний монгол
төгөлдөр хуурчдыг төрүүлэх зорилготой” ажиллаж байгаагаа илэрхийлж, шавь нар
маань ч сүүлийн жилүүдэд амжилтын буухиа таслахгүй байгаад урамтай байна гэсэн
юм.
С.Саянцэцэг нь ард түмний дунд ардын дуу шиг түгсэн “Зулай
цагаан Алтай”, “Миний ээж тэмээчин” зэрэг дууны эзэн, Урлагийн гавьяат зүтгэлтэн Ч.Сангидорж агсны ууган охин
билээ. Тэрбээр Москва, Софи, Мексик, Мадридын дуурийн театраас гадна дэлхий
дахины сонгодог урлагийнхны мөрөөдлийн тавцан болсон алдарт Карнеги холлд уран
бүтээлээ эгшиглүүлсэн анхны монгол төгөлдөр хуурч юм.
