Ulaanbaatar
Улаанбаатар болон Бурёнг хот хооронд хамтын ажиллагааны санамж бичиг байгууллаа
МОНГОЛЫН МЭДЭЭ | УЛС ТӨР
Улаанбаатар, 2025 оны арваннэгдүгээр сарын 8 /МОНЦАМЭ/. Монгол Улсын нийслэл Улаанбаатар хот болон Бүгд Найрамдах Солонгос Улсын Бурёнг хот хооронд энэ сарын 7-нд хамтын ажиллагааны санамж бичиг байгууллаа.
Санамж бичигт нийслэлийн Засаг даргын орлогч А.Амартүвшин,
Бурёнг хотын дарга Ким Дон Ил гарын үсэг зурсан юм. Тус хамтын ажиллагааны
санамж бичгийг байгуулснаар хоёр хот соёл, аялал жуулчлал, боловсрол, эдийн
засаг, байгаль орчны салбарт хамтран ажиллах боломж бүрдэж байна.
Ташрамд, Монгол Улс, Бүгд Найрамдах Солонгос Улс 1990 оны гуравдугаар
сарын 26-нд дипломат харилцаа тогтоосон бөгөөд энэ жил 35 жилийн ой тохиож
буй. Манай хоёр улсын харилцаа нь олон салбарт өргөжин хөгжиж, түүхэн болон
стратегийн чухал түншлэл юм.
Тухайлбал, 1990 оны байдлаар хоёр улсын гадаад худалдааны эргэлт 2.7 сая байсан бол 2024 оны эцэст 620 сая ам.доллар болж өсөн нэмэгдсэн. Монгол Улсын хувьд БНСУ-аас автомашин, тамхи, гоо сайхны бүтээгдэхүүн зэргийг голчлон импортолдог бол тус улсад молибден, жонш зэрэг ашигт малтмалын төрөл, ноолууран хувцасны төрлийн бүтээгдэхүүн экспортолдог гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.
