Ulaanbaatar
Монголын баг тамирчид олон улсын роботын тэмцээнээс 18 медаль авлаа
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 20 /МОНЦАМЭ/. Монголын баг тамирчид БНХАУ-ын Бээжин хотноо энэ сарын 15-19-нд болсон “Робот чаллэнж” (Robot Challenge) олон улсын роботын тэмцээнээс 6 алт, 7 мөнгө, 5 хүрэл медаль авч, амжилттай оролцов.
Тэмцээнд Монголын
робот хөгжүүлэлтийн холбоо, Шинэ эрин, Монгол тэмүүлэл, Улаанбаатар хотын 44
дүгээр сургууль, Орхон Эмпати, Өмнөговь аймгийн Ханбогд сумын хоёрдугаар
сургууль гээд 100 гаруй хүний бүрэлдэхүүнтэй баг тамирчид ийнхүү оролцож, нийт
18 медаль хүртэж, дэлхийн тавцанд эх орныхоо нэрийг өргөлөө.
Энэ удаагийн
тэмцээнд 42 орны таван мянга гаруй тамирчин өрсөлдсөн байна. Манай улсын баг
тамирчид 2018 оноос хойш 5 дахь удаагаа оролцож, “Robot Rugby” төрөлд 4 дэх удаагаа түрүүлж, амжилтаа
баталсан юм.
Олон улсын роботын тэмцээнийг 2004 онд Австри улсад, 2017 оноос БНХАУ-д зохион байгуулж эхэлжээ. Жилээс жилд өргөжсөөр эдүгээ 82 орны тамирчдыг хамарсан дэлхийн хамгийн том хиймэл оюунт роботын тэмцээний нэг болж хөгжжээ.
