Ulaanbaatar
Тэрүнофүжи Г.Ган-Эрдэнэ жилийн дараа Жониданд барилдаж нэг давлаа
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Өнөөдөр Осака хотноо Японы мэргэжлийн сумо бөхийн Харү башё эхэлж байгаа бөгөөд зүүн жигүүрийг 69 дэх Их аварга Хакүхо М.Даваажаргал тэргүүлж, 71 дэх Их аварга Какүрюү М.Ананд баруун жигүүрийг манлайлна.
Озэки цолтнуудыг Такаясү манлайлсан бол өнгөрсөн башёгийн түрүү бөх Тамаваши Б.Мөнх-Оргил Сэкиваке цолтой барилдана. Тэрбээр хамгийн сүүлд 2018 оны нэгдүгээр сард Сэкиваке цолтой барилдаж байв.
Мэргэжлийн сумо бөхийн Озэки асан Тэрүнофүжи Г.Ган-Эрдэнэ энэ хаврын тэмцээнээс дохёндоо эргэн ирж байгаа бөгөөд өнөөдөр өглөө эхний даваагаа авсан талаар спортын сэтгүүлч М.Сугар-Эрдэнэ мэдээлж байна.
Хүнд бэртсэний улмаас барилдалгүй бараг жил болсон Тэрүнофүжи өнөөдөр Жониданы дохён дээр гарч ирж барилдлаа. Жонидан зиндааны барууны 48-д бичигдсэн Тэрүнофүжи зүүн жигүүрийн 48 дахь бөх Ваканогүчиг зайлж, давав.
Өнгөрсөн жилийн хаврын тэмцээний 11 дэх өдрөөс хойш анх удаа ялалтын амтыг мэдэрсэн нь энэ аж. Харин тухайн үед Тэрүнофүжи Жюүрёод барилдаж байв. Өглөөний 10 цаг орчим эл хуль байсан Бөхийн өргөөнд хоёр өвдгөө боосон Тэрүнофүжиг орж ирэхэд цөөн хэдэн үзэгч нь ихэд баярлан угтжээ. Зайлсан ч гэсэн ялж чадсан Тэрүнофүжи сэтгүүлчдэд “Дохён дээр гаралгүй удсан болохоор бага зэрэг эвгүй байлаа. Нэг сонин мэдрэмж төрж байв. Үзэгчдийн дэмжин хашхирч байгааг сонсоод баярласан” гэж ярьсан байна.
Озэки байсан бөх Макүшита зиндаанд барилдаж байсан түүх байхгүй. Харин манай бөх Жониданаас буцаад дээд зиндаа /Макүүчи/-нд дэвших зорилготой барилдаж байгаа юм.
