ХӨВСГӨЛ: Улаанбурхан өвчний тохиолдол нэмэгдэж байна
ОРОН НУТГИЙН МЭДЭЭ | ХӨВСГӨЛ
Мөрөн, 2026 оны гуравдугаар сарын 25 /МОНЦАМЭ/. Хөвсгөл аймагт улаанбурхан өвчний тохиолдол нэмэгдэж он гарсаар 53 тохиолдол батлагдсан байна.
Өнөөдрийн байдлаар сүүлийн 7 хоногт шинэ тохиолдол 6 нэмэгдсэн бөгөөд одоогоор 10 хүүхэд эмнэлэгт эмчлүүлж байна.
Эмнэлэгт хэвтэн эмчлүүлж байгаа хүүхдүүдийн биеийн байдлын хувьд 1 хүүхэд хүнд, 9 хүүхэд хүндэвтэр байна гэж аймгийн Эрүүл мэндийн газраас мэдээллээ.
Өвдсөн 6 хүүхдийн нэг нь товлолт вакцин хийлгээгүй, үлдсэн тав нь 9 сартайгаас доош насны, вакцин хийх насанд хүрээгүй хүүхдүүд байна.
Энэхүү өвчнөөс урьдчилан сэргийлэх зорилгоор 6-8 сартай болон 10-15 насны хүүхдүүдийг нэмэлт дархлаажуулалтад хамруулж байна. Бага насны хүүхэд улаанбурхан өвчний тохиолдолтой хавьтал болсон, халуурах болон тууралтын шинж тэмдэг илэрсэн тохиолдолд аймгийн Нэгдсэн эмнэлгийн халдвартын амбулаториор үйлчлүүлэхийг зөвлөлөө.
