Төв Ази-Японы анхны дээд хэмжээний уулзалт Токио хотод амжилттай болж өндөрлөв. Төр, засгийн тэргүүн нарын түвшинд хоёр өдөр үргэлжилсэн энэхүү уулзалтаар “Токиогийн тунхаглал”-ыг баталлаа. Уг тунхаглалд байгаль орчинд ээлтэй ба тогтвортой байдал, харилцаа холбоо, хүний нөөцийн хөгжил гэсэн хамтын ажиллагааны гурван тэргүүлэх чиглэлийг тодорхойлжээ. 
Украины Ерөнхийлөгч Владимир Зеленский Киев, Москва, Вашингтоны хэлэлцэж буй 20 заалт бүхий энхийн төлөвлөгөөг танилцууллаа. Тэрбээр уг төлөвлөгөөг “дайныг дуусгах үндсэн баримт бичиг” гэж мэдэгдээд энхийн төлөвлөгөөний ихэнх заалтыг тохиролцсон боловч Донбассын бүс нутаг, Запорожийн цөмийн цахилгаан станцын статус маргаантай хэвээр байгааг дурджээ. Уг төлөвлөгөөнд заасны дагуу холбоотнууд Украинд аюулгүй байдлын бат бөх баталгааг гаргаж өгнө. Мөн Украины Зэвсэгт хүчин энхийн цагт 800 мянган албан хаагчтай хэвээр байна гэж тусгажээ. Түүнчлэн Украиныг Европын Холбоонд элсүүлэх, төлөвлөгөөг дагаж мөрдөж байгаа эсэхийг хянах зорилгоор Дональд Трампаар даргалуулсан Энхийн зөвлөл байгуулах тухай заалтууд багтсан байна. 
АНУ-ын Төрийн департамент Европын Холбооны гишүүн орнуудын таван иргэнд визний хязгаарлалт тогтоолоо. Тэдний дотор Европын комиссар асан Тьерри Бретон болон худал мэдээлэл, үзэн ядсан агуулга бүхий контенттой тэмцэх чиглэлээр ажилладаг байгууллагуудын удирдагчид байна. АНУ-ын эрх баригчид тэднийг технологийн компаниудад дарамт шахалт үзүүлсэн, “америкчуудын үг хэлэх эрх чөлөөг цензүүрдсэн” гэж буруутгажээ. АНУ, Европын Холбооны хооронд дижитал платформуудыг зохицуулах Digital Services Act буюу Цахим үйлчилгээний тухай хуультай холбоотой маргаан хурцдаж буй үед энэхүү шийдвэр гарлаа. Уг хуулийг Европт хэрэглэгчдийг хамгаалах механизм гэж үзэж байгаа бол АНУ-д үүнийг үг хэлэх эрх чөлөө, Америкийн технологийн бизнесийн ашиг сонирхолд аюул учруулж байна гэж үзэж байна. Европын Комисс, Францын Ерөнхийлөгч Эммануэл Макрон, мөн Герман, Испанийн эрх баригчид визний хоригийг Европын дижитал тусгаар тогтнолыг боомилсон шахалт гэж мэдэгдэв.
АНУ-ын зэвсэгт хүчин Нигерийн баруун хойд хэсэгт “Лалын улс” бүлэглэлийн террористуудад “хүчтэй, үхлийн цохилт” өгсөн гэж Ерөнхийлөгч Дональд Трамп мэдэгдлээ. Трамп Нигерид христ шашинтнууд руу халдахгүй байхыг анхааруулснаас хэдхэн долоо хоногийн дараа цохилтыг өгсөн байна. Нигерийн Гадаад хэргийн яам агаарын цохилтууд өгснийг баталж, улс доторх террорист бүлэглэлийн байг оновчтой цохисон ажиллагаа хэмээн мэдэгдэв.
Тайланд, Камбожийн цэргийнхэн 12 дугаар сарын 27-ноос эхлэн 72 цагийн хугацаанд гал зогсоохоор тохиролцжээ. Ингэснээр талууд АНУ-ын Ерөнхийлөгч Дональд Трампын зуучлалаар 
Израил улс Сомалиас салан тусгаарласан Сомалиландыг “бие даасан, тусгаар тогтносон” улс гэж хүлээн зөвшөөрсөн дэлхийн анхны улс боллоо. Израилын Ерөнхий сайд Биньямин Нетаньяху, Гадаад хэргийн сайд Гидеон Саар, Сомалиландын Ерөнхийлөгч Абдирахман Мохамед Абдуллахи нар тусгаар улсаар хүлээн зөвшөөрсөн мэдэгдэлд гарын үсэг зуржээ. Турк, Египет, Сомали, Жибути улсууд Израилын энэ алхмыг буруушаалаа.
Өөрийгөө зарлан тунхагласан Бүгд Найрамдах Сомалиланд Улс нь Сомалийн дарангуйлагч Сиад Баррегийн дэглэмийг эсэргүүцсэн дайны үеэр 1991 онд үүсжээ. Энд ойролцоогоор зургаан сая хүн амьдардаг бөгөөд Адены булангийн эрэгт стратегийн байрлалтай, өөрийн гэсэн цагдаагийн байгууллага, валют, паспорттой байна.
Израил сүүлийн жилүүдэд Африк, Ойрх Дорнодын орнуудтай харилцаагаа хэвийн болгохыг оролдож байгаа хэдий ч Газын зурвас болон Ираны эсрэг хийж буй дайн нь саад учруулжээ.
Оны зааг дээр Америкийн хувьцаануудын ханш уламжлал ёсоор өсдөг үе болох “Санта-Клаусын ралли” эхэллээ. Хөрөнгө оруулагчид АНУ-ын хөдөлмөрийн зах зээлийн мэдээллийг, мөн Холбооны нөөцийн сан (Төв банк) бодлогын хүүг цаашид бууруулах эсэхийг анхааралтай ажиглаж байна.
Эдийн засгийн тодорхойгүй байдал, ам.долларт итгэх итгэл буурсны нөлөөгөөр мөнгө, алтны үнэ түүхэн дээд хэмжээнд хүрлээ. Арилжааны мэдээллээр, мөнгөний үнэ анх удаа нэг унц нь 75 ам.доллароос давсан бол алтны үнэ мөн өсөж, нэг унц нь 4531 ам.долларт хүрсэн нь шинэ дээд үзүүлэлт болжээ. Оны эхнээс алтны үнэ 70 орчим хувиар, мөнгөний үнэ 150 гаруй хувиар өсжээ. Зах зээл дээр ийм огцом өсөлт 1970-аад оны сүүл үеэс хойш ажиглагдаагүй байна.
