Ulaanbaatar
БАЯНХОНГОР: Хүчтэй салхи, шороон шуургатай байхыг анхааруулав
ОРОН НУТГИЙН МЭДЭЭ | БАЯНХОНГОР
Баянхонгор /МОНЦАМЭ/. Говь болон хээр талын нутгаар өнөөдөр салхи шуургатай байхыг аймгийн УЦУОША-наас мэдээллээ. Салхи секундэд 18-20 метр, зарим үед секундэд 24 метрийг давж ширүүсэн, хүчтэй салхи, шороон шуургатай байхыг тус албанаас анхааруулж байна.
27-нд Хангай, хээр талын нутгийн зарим газраар ялимгүй хур тунадас орно. Салхи 27, 30-нд говь болон хээр талын нутгаар секундэд 12-14 метр. Зарим үед 18 метр давж ширүүсэж явган шороон шуурга шуурна.
Хангайн уулархаг нутгаар шөнөдөө -3 градус хүйтнээс 2 градус дулаан, өдөртөө +4...+9 градус, тал хээрийн нутгаар шөнөдөө 0...+5 градус, өдөртөө +6...+11 градус, говийн нутгаар шөнөдөө +5...+10 градус, өдөртөө +14...+19 градус, Эхийнголын Баянбүрд орчмоор шөнөдөө +9...+14 градус, өдөртөө +18…+23 градус дулаан байна. 27-нд бага зэрэг сэрүүснэ.
-Иргэд цаг агаарын мэдээ, мэдээллийг цаг тухай бүр сонсон, мэргэжлийн байгууллагаас өгч буй сэрэмжлүүлэг, анхааруулгыг дагах
-Тээврийн хэрэгслийн жолооч нар хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй дулаан хувцастай зорчих
-Малчид болзошгүй эрсдлээс урьдчилан сэргийлж, салхи шуурганд төөрөх, малтайгаа уруудах эрсдэлээс урьдчилан сэргийлж малаа ойрын бэлчээрт хариулах, бага насны хүүхдийг малд явуулахгүй байхыг аймгийн Онцгой байдлын газраас анхааруулж байна.
