Ulaanbaatar
Гарал үүсэл тодорхойгүй 1.6 тонн хүнсний бүтээгдэхүүнийг устгажээ
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Замын-Үүд боомтоор Монгол Улс руу нэвтрүүлэхийг завдсан гарал үүсэл тодорхойгүй, хаяг шошгоны зөрчилтэй 1.6 тонн хүнсний бүтээгдэхүүнийг устгалд оруулжээ.
Энэ талаар Логистик хяналтын терминалын хорио цээрийн хяналтын улсын ахлах байцаагч Д.Уранбаяр мэдээлэхдээ, "Өнөөдрийн байдлаар нэг аж ахуйн нэгж импортоор оруулсан төрөл бүрийн ачаа тээвэрт мэргэжлийн хяналт шалгалт хийсэн. Ингэхэл гарал үүсэл тодорхойгүй, хаяг шошгоны зөрчилтэй хүнсний бүтээгдэхүүн, бичиг баримтын зөрчилтэй 62000 ширхэг нэг удаагийн амны хаалт, бичиг баримтгүй 40 хайрцаг гоо сайханы бүтээгдэхүүн байна. Өнгөрсөн хугацаанд 338.8 тонн ургамлын гаралтай түүхий эд, эмнэлгийн хэрэгслийг экспортлогч улсад буцааж, 39 145 ширхэг хүнсний бүтээгдэхүүн, эм эмнэлгийн хэрэгсэл, гоёл чимэглэлийн цэцэг, гоо сайхны бүтээгдэхүүнийг хурааж, 1.6 тонн хүнсний бүтээгдэхүүнийг устгалаа" хэмээв.
Харин Замын-Үүд дэх Төмөр замын логистик хяналтын цэгийн Хилийн мэргэжлийн хяналтын албаны улсын ахлах байцаагч С.Солонго, "Улсын хилээр өдөрт дунджаар 160 тээврийн хэрэгсэл нэвтэрч ирж байна. Замын–Үүд боомт дээр таван терминал бараа, бүтээгдэхүүнийг ангилан хяналт шалгалтыг хийж гүйцэтгэж байна. Нэг сард 4200 орчим тээврийн хэрэгсэл нэвтэрч, гадаргуугийн болон жолоочийн бүхээгт халдваргүйжилт хийж байж байгаа. Хилийн мэргэжлийн хяналтын албанаас өдөрт дунджаар 150 иргэн, аж ахуйн нэгжийн импортлосон 5000 гаруй тонн, 24000 ширхэг бараа бүтээгдэхүүнд хяналт, шалгалт хийдэг" хэмээв.
Түүнчлэн Хилийн мэргэжлийн хяналтын албаны Байгаль орчны хяналтын улсын байцаагч н.Золбадрах, "Төмөр замын ариутгалыг мэргэжлийн байгууллага болох Баяндэмбэрэл ХХК хийж, чанар үр дүнд мэргэжлийн хяналтаас хяналт тавьдаг. Энд хэрэглэж байгаа халдваргүйжүүлэлтийн уусмалын концентраци, хлорын агууламжийг долоо хоног тутамд лабораторийн шинжилгээнд өгч дүгнэлт гаргаж байгаа. Өнөөдрийн байдлаар нийт 7 цуваа 450 орчим чингэлэг Замын-Үүд боомтоор орж ирсэн. Мэргэжлийн хяналтад бичиг баримтын хяналтад хамрагдахаас гадна гадаргуугийн халдваргүйжүүлэлтэнд ордог. Төмөр замын чингэлгийн дагалдуулж ирсэн баримт бичгийн хяналтуудыг хийж, хилийн мэргэжлийн хяналтын албаны хяналтад хамрагдах бараа бүтээгдэхүүнд хяналтын хуудас бичиж, гүний хяналт руу шилжүүлдэг. Шадар сайдын тушаалаар мэргэжлийн хяналтанд чөлөөлөгдсөн бараа, бүтээгдэхүүнүүдэд бол бичиг баримтын хяналт хийгдээд шууд гүний хяналтад шилждэг" хэмээв.
