Ulaanbaatar
“Минск-2”-ын заалтыг биелүүлбэл ОХУ-д авсан хоригоо цуцална
ДЭЛХИЙН МЭДЭЭ | УЛС ТӨРМОСКВА. /RIA Novosti/. Хэрэв Украины асуудлаар байгуулсан гэрээний бүх заалтыг биелүүлбэл ОХУ-д авсан хориг арга хэмжээг АНУ-ын Ерөнхийлөгч Барак Обама цуцлахад бэлэн байгааг тус улсын Төрийн нарийн бичгийн дарга Москва хотод хэлэлцээ хийх үеэрээ мэдээлжээ.
“Хэрэв бүх зэвсэг, цэргээ гаргах, Украины хилийн бүрэн эрхт байдлыг эргүүлэн өгөх зэргийг оруулаад Минскийн гэрээний бүх заалтыг биелүүлбэл хориг арга хэмжээг цуцална гэсэн Ерөнхийлөгч Обамагийн амлалтыг би дахин уламжилсан” гэж Керри хэлэлцээ дууссаны дараа хэлсэн байна.
“Сүүлийн жилүүдэд ОХУ болон АНУ хооронд санал зөрөлдөөн гарч байгаа гэдгийг бид мэднэ. Гэхдээ өнөөдөр болсон шиг ийм бодит хэлэлцүүлэг сайн үр дүнд хүргэнэ” гэж тэрбээр үргэлжлүүлэн хэлжээ.
“Ахиц дэвшилд хүрэхийг оролдож, хүрэхийн тулд үргэлж хүчин чармайлт тавих хэрэгтэй” гэж Керри онцлон дурдсан байна.
Одоогийн байдлаар ОХУ, АНУ-ын харилцаа Украины байдалтай холбоотойгоор хурцадмал байдалтай байгаа юм. Европын Холбоо болон АНУ-аас тус улсад авсан хориг арга хэмжээ 2014 оны долдугаар сарын сүүлээр хувь хүмүүс болон компаниудад авсан хоригоос Оросын эдийн засгийн бүхэл бүтэн салбарын эсрэг чиглэсэн арга хэмжээ болж хувирсан юм.
2014 оны гуравдугаар сарын эхээр Украинд болж буй үйл явдлын улмаас ОХУ-д авсан хориг арга хэмжээг АНУ-ын Ерөнхийлөгч Барак Обама энэ сарын эхээр сунгасан билээ. Обама энэ хориг арга хэмжээг ямар ч үед цуцалж магадгүй гэдгийг Америкийн Элчин сайдын яам сануулсан байна.
Д.Жаргал
