Улаанбаатар
С.Нансалмаа: Түрээсийн орон сууцтай холбоотой өргөдлийг хүлээж авах болоогүй
ОРОН НУТГИЙН МЭДЭЭ | ОРХОН
Орхон/МОНЦАМЭ/ Орхон аймагт Хөгжлийн банкны санхүүжилтээр 315 айлын түрээсийн орон сууц барьж байна. Барилгын ажил 75 хувийн гүйцэтгэлтэй. Орхон аймаг Баян-Өндөр, Жаргалант сумын нийт 24 багтай, үүний 60 гаруй хувь нь гэр хорооллынх юм. Иймд түрээсийн орон сууцны талаар аймгийн ЗДТГ-ын Хөрөнгө оруулалт, хөгжлийн бодлого, төлөвлөлтийн хэлтсийн мэргэжилтэн С.Нансалмаагаас тодрууллаа.
-Түрээсийн
орон сууцны талаар иргэд хэнд хандаж мэдээлэл авах талаар асууж байна. 315 айлын орон сууцны барилга бүрэн дууссаны
дараа ямар журмаар иргэдэд түрээслүүлэх вэ?
- Одоогоор барилгаа барьж дуусаагүй учир иргэдээс ямар ч өргөдөл, хүсэлт хүлээж авахгүй байгаа. ТОСК-иас гаргасан журам бий. Үүний дагуу л иргэдэд түрээслүүлнэ. Журамд туссаны дагуу, орон сууцны үнийг тогтоохдоо Улаанбаатар хотод нэг ам метр талбайг 6000, орон нутагт 4500 төгрөгөөр баталсан.
Өргөдлийг хүлээн авахдаа журамд заасны дагуу зорилтот бүлгээр нь ангилна. Дараа нь судалгаа хийнэ. Уг судалгааг үндэслэж ТОСК-с ирүүлсэн орон тооны дагуу залуу гэр бүл буюу 35 хүртэлх насны гэр бүлд буюу нийт байрны 10 хувьд, 30 хувийг нь төрийн албан хаагчид, 20 хувийг нь хувийн байгууллага болон хувиараа хөдөлмөр эрхэлж байгаа иргэдэд олгоно.
Мөн 18 хүртэлх насны дөрөв ба түүнээс дээш хүүхэдтэй гэр бүлд таван хувь, өрх толгойлсон эцэг, эхэд таван хувь, өндөр насны тэтгэвэр тогтоолгосон ахмад
настанд 20 хувь, хөгжлийн бэрхшээлтэй иргэн болон түүнийг халамжилдаг гэр бүлд таван хувь, гамшиг, аюулт үзэгдлийн улмаас орон гэргүй болсон иргэнд нийт байрны таван хувийг нь олгохоор журамд туссан байгаа.
-Энэ
ондоо багтаж иргэдэд түрээсээр олгох уу?
-Уг нь ирэх сарын сүүлээр ашиглалтад хүлээн авах байсан боловч цаг агаарын байдлаас болж бага зэрэг хойшилж байна. Улсын болон техникийн комисс ажиллахаас эхлээд олон ажил бий. Тухайн үед хэвлэл мэдээллээр дамжуулан иргэдийн өргөдлийг хаана, хэн хүлээж авах, ямар бичиг баримт бүрдүүлэх талаар мэдээлнэ.
Гэхдээ энд бас нэг зүйлийг онцолж хэлэхэд,
түрээсийн орон сууцыг таван жилийн хугацаатай түрээслээд дараагийн иргэнд шилжүүлнэ. Хүмүүс эхлээд түрээсэлчихээд дараа нь хувьчилж авна гэж буруу
ойлгоод байна.
-Орхон
аймагт ТОСК-ийн журмын дагуу түрээсийн орон сууцанд амьдарч байгаа хэдэн өрх
байна вэ?
-Түрээсийн орон сууц хөтөлбөр Монгол Улсад
2015 оноос хэрэгжиж эхэлсэн. Орхон аймагт 2016 онд 40 айлыг “Баян-Өндөр хотхон”
орон сууцны хороололд оруулсан.
Б.Оюун-Эрдэнэ
