Улаанбаатар, 2024 оны дөрөвдүгээр сарын 26 /МОНЦАМЭ/. Гадаад харилцааны сайд Б.Батцэцэгийн урилгаар Британийн Гадаад хэрэг, хамтын нөхөрлөл, хөгжлийн сайд Дэвид Камерон манай улсад сарын 25-26-ны өдрүүдэд албан ёсны айлчлал хийв. Уг айлчлал нь Монгол Улс, Их Британи, Умард Ирландын Нэгдсэн Хаант Улс хоорондын түншлэлийг бэхжүүлэх, хамтын ажиллагааг өргөжүүлэхэд чухал ач холбогдолтой.

Монгол, Британийн хооронд 1963 оны нэгдүгээр сарын 23-нд дипломат харилцаа тогтоосон бөгөөд 2023 онд 60 жилийн ой тохиосон. Эдүгээ ардчилсан үнэт зүйлсэд суурилсан Монгол, Британийн түншлэл худалдаа, хөрөнгө оруулалт, энхийг сахиулах ажиллагаа, байгаль орчин болон биологийн олон янз байдлыг хамгаалах, соёлын салбар зэрэг өргөн хүрээнд өрнөж байна.

Хоёр өдөр үргэлжилсэн айлчлалын үеэр Гадаад харилцааны сайд Б.Батцэцэг Британийн Гадаад хэрэг, хамтын нөхөрлөл, хөгжлийн сайд Дэвид Камерон нар хоёр талын хамтын ажиллагааны асуудлаар албан ёсны хэлэлцээ хийв. Айлчлалын хөтөлбөрийн хүрээнд Монголын үндэсний соёл, урлагийн тоглолт болон Британийн англи хэлний Пирсон хөтөлбөрийг сургалтдаа нэвтрүүлсэн ерөнхий боловсролын дунд сургуулийн үйл ажиллагаатай танилцав. Түүнчлэн Монгол Улсын Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нарт Гадаад хэрэг, хамтын нөхөрлөл, хөгжлийн сайд Дэвид Камерон тус тус бараалхав.

Албан ёсны хэлэлцээний үеэр талууд хоёр талын харилцааг өргөжүүлэх боломжийн талаар санал солилцож, хамтын ажиллагааг худалдаа, эдийн засаг, соёл, боловсрол, аялал жуулчлал, цахим засаглал болон геологийн салбарт өргөжүүлэхийн төлөө байгаагаа харилцан нотлов. Мөн англи хэл заах монгол багш нарт зориулсан сургалтыг дэмжсэн шинэ санаачилга хэрэгжүүлэхээр шийдсэн байна. Сайд нар мөн тогтвортой хөгжлийн зорилтуудаа хэрэгжүүлэх, тухайлбал “Тэрбум мод” зэрэг үндэсний санаачилгын хүрээнд хамтран ажиллаж, уур амьсгалын өөрчлөлттэй тэмцэхэд хувь нэмрээ оруулах талаар ярилцав.

Гадаад харилцааны сайд нар гуравдагч хөршийн түншлэлийг бэхжүүлэхэд чиглэсэн Монгол Улс, Их Британи, Умард Ирландын Нэгдсэн Хаант Улсын хамтын ажиллагааг иж бүрэн түншлэлд хүргэх замын зураглалд гарын үсэг зурав. Уг баримт бичигт худалдаа, соёл, байгаль орчин, боловсрол, шинжлэх ухаан, технологи, хүний эрх, эрүүл мэнд, энхийг сахиулах зэрэг чиглэлээр хамтын ажиллагааг гүнзгийрүүлэхээр тохиролцсон. Түүнчлэн Чухал ашигт малтмалын чиглэлээр хамтран ажиллах харилцан ойлголцлын санамж бичигт талууд гарын үсэг зурав. Энэ нь чухал ашигт малтмалын салбар дахь худалдаа, хөрөнгө оруулалтын түншлэлийн суурь баримт бичиг бөгөөд нөөцийг тогтоох, судалгаа хийх туршлага хуваалцах, уг салбарт байгаль орчин, засаглалын стандарт нэвтрүүлэх, ил тод үйл ажиллагааг дэмжих ач холбогдолтой.