Улаанбаатар
Н.Учрал: Технологийн дэвшил ашиглан дуу хоолойгоо хүргэж байна
МОНГОЛЫН МЭДЭЭ | НИЙГЭМ
Улаанбаатар, 2024 оны гуравдугаар сарын 19 /МОНЦАМЭ/. Цахим хөгжил, харилцаа холбооны сайд Н.Учрал БНСУ-ын Сөүл хотноо энэ сарын 18-20-нд зохион байгуулагдаж буй “Хиймэл оюун ухаан-Дижитал технологи ба Ардчилал” ардчиллын төлөөх дээд хэмжээний уулзалтад оролцож байна.
Сайд Н.Учрал энэ үеэр “Хиймэл оюун ухаан-Дижитал технологи
ба Хүртээмжтэй нийгэм” сэдвээр хэлсэн
үгэндээ, “Бид ардчиллыг бэхжүүлж мэдэх эрхийг хангуулахаар “Шилэн”
нэртэй ил тод байдлын нэгдсэн платформыг олон нийтэд танилцуулсан. Энэ платформд
13 сая гаруй удаа хандаад байгаа. Улсын
хэмжээнд Засгийн газрын
хөрөнгийн зарцуулалтын талаар хэд хэдэн хэлэлцүүлэг өрнүүлж, 92 тэрбум төгрөгийн зээлийг буцаан
төлүүлжээ. Энэ нь манай ард түмэн технологийн
дэвшлийг ашиглан дуу хоолойгоо хүргэж, бодит үр дүнд хүрч байгаагийн тод жишээ
юм” гэлээ.
Дээд түвшний уулзалтад БНСУ-ын Eрөнхийлөгч Юн Сог Ёль, АНУ-ын Төрийн нарийн бичгийн дарга Энтони Блинкен, Их Британийн Шадар сайд Оливер Доуден болон Эстони, Швед, Шинэ Зеланд, Энэтхэг, Австрали зэрэг 30 орчим улсын гадаад харилцаа, цахим засаглал, мэдээллийн технологийн асуудал эрхэлсэн сайд нар оролцож байгааг ЦХХХЯ мэдээлэв.
