Ulaanbaatar
Өсвөрийн ДАШТ-ий охидын 57 кг-ын жинд Монголын тамирчид хоёр жил дараалан түрүүллээ
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 30 /МОНЦАМЭ/. Болгарын Софи хотод үргэлжилж буй жүдо бөхийн өсвөрийн дэлхийн аварга шалгаруулах тэмцээний гурав дахь өдөр манай зургаан бөх дэвжээнд гарснаас алт, хүрэл медаль хүртлээ.
Тодруулбал, охидын 57 кг-ын жинд “Виннер” клубын тамирчин М.Цэндбазар алтан медалиар энгэрээ мялааж, төрийн дууллаа Софид эгшиглүүлэв. С хэсгийн тэргүүлэн барилдсан тэрбээр эхлээд Шведийн Ханна Бабулфатыг, шөвгийн 16-д Грекийн Данаи Димоуг, наймд ОХУ-ын Екатерирна Ждановаг, дөрөвт Польшийн Магдалена Валегаг тус бүр цэвэр ялсан. Улмаар финалд Японы бөх Нонока Ямакаваг юүкогоор ялснаар дэлхийн аваргад түрүүлэв. Тэр өсвөрийн ДАШТ-д түрүүлсэн хоёр дахь монгол тамирчин болж байна. Ингэхдээ Монголын хоёр тамирчин хоёулаа 57 кг-ын жинд дараалан түрүүллээ. Өнгөрсөн жилийн ДАШТ-д “Гүрү Дожо”-гийн тамирчин Т.Ариунзаяа яг энэ жинд түрүүлсэн юм.
Тэгвэл энэ жинд
барилдсан манай хоёр дахь тамирчин Г.Энхжин хүрэл медаль зүүлээ. Түүний хувьд эхний
тойрогт Гүржийн Тинатин Гүльбаниг, шөвгийн 16-д Польшийн Юлиа Сьемког, наймд
Туркийн Элиф Киличийг цэвэр ялсан ч хагас шигшээд Японы Нонока Ямакавад
ялагдсан юм. Улмаар хүрэл медалийн төлөө ОХУ-ын Екатерина Ждановаг цэвэр
ялснаар шагналын тавцанд зогсох эрхтэй болов. Ийнхүү Монголын хоёр тамирчин нэг өдөр нэг жинд медаль хүртлээ.
Эхний гурван өдрийн дараа Монголын баг нэг алт, хоёр хүрэл медаль хүртсэн амжилттайгаар зургаадугаар байрт жагсаж байна. Өнөөдөр хөвгүүдийн -90, +90, охидын -70, +70 кг-ын жингийн барилдаан болох бөгөөд манай улсаас Н.Амартүвшин, Г.Мөнхбагана, Ж.Дэлгэр, Б.Тэргэлнаран нар дэвжээнд гарна.
