Ulaanbaatar
МҮОХ-ноос зөвлөх багш Казүхито Сакайг дэмжинэ
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 29 /МОНЦАМЭ/. Японы чөлөөт бөхийн нэрт дасгалжуулагч Казүхито Сакай манай улсын чөлөөт шигшээ багийн зөвлөхөөр 2028 оны Лос-Анжелесын олимп хүртэл ажиллана.
МҮОХ-ны удирдлагууд түүнийг өнөөдөр хүлээн авч уулзжээ. Энэ үеэр МЧБХ-ноос “Лос Анжелес 2028” олимпын наадам хүртэлх хугацаанд шигшээ багийн эрэгтэй, эмэгтэй баг тамирчдын бэлтгэл сургуулилалтад дасгалжуулагч Казүхито Сакай зөвлөх багшаар хамтран ажиллахаар болсныг дурдан, үйл ажиллагааны талаар мэдээлэл өгчээ. Тус холбоо ахмад тамирчдынхаа Олимпод амжилт гаргахад нөлөөлсөн хүчин зүйлсийн судалгааг үндэслэн тамирчдын бэлтгэл хооронд амрах зориулалттай хоёр өрөөг бүрэн тохижуулж, ашиглалтад оруулсан байна. Энэ өрөөг тохижуулахад МҮОХ-ноос санхүүгийн дэмжлэг үзүүлжээ.
Харин зөвлөх дасгалжуулагч Сакай Олимпын баг тамирчдын бэлтгэл сургуулилалт, техник, сэтгэл зүй, төлөвлөгөөнд зөвлөгөө өгөхөөс гадна чөлөөт бөхийн сургалтын системийг сайжруулахаар шигшээ баг болон аймаг орон нутгийн дасгалжуулагч нарт зориулсан сургалтуудыг зохион байгуулах гэрээ байгуулсан аж.
Уулзалтын үеэр Сакай хэлэхдээ, “Тамирчин хүн амжилт гаргах арга барилаа тодорхойлж, сэтгэхүйгээ бүрэн дайчилж чадвал амжилтын оргилд хүрэхэд болохгүй зүйл байхгүй. Монголын баг тамирчдыг “Лос Анжелес 2028” олимпын наадамд амжилт үзүүлэхэд би бүх хүчээ дайчлах болно. МҮОХ-ноос дэмжиж байгаад баярлалаа” гэв. МҮОХ нь ОУОХ-ны Эв санааны нэгдлийн төсөл хөтөлбөрийн шугамаар 25 мянган ам.долларын санхүүжилтийг хоёр жилийн хугацаанд зөвлөх дасгалжуулагч Казүхито Сакайд олгоно.
