Ulaanbaatar
Монголын дөрвөн тамирчин хөнгөн атлетикийн ДАШТ-д оролцоно
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 29 /МОНЦАМЭ/. Хөнгөн атлетикийн насанд хүрэгчдийн дэлхийн аварга шалгаруулах тэмцээн ирэх сарын 13-нд Японы Токио хотод эхэлнэ.
20 дахь удаагийн тэмцээнд дэлхийн 200 гаруй орны баг тамирчин 49 багц медалийн төлөө өрсөлдөх юм. Есөн өдрийн турш үргэлжлэх тус тэмцээнд манай улсаас марафон гүйлтийн төрөлд эрэгтэй, эмэгтэй тус бүр хоёр тамирчин эрхээ авчээ.
Тодруулбал, Монгол Улсын гавьяат тамирчин Б.Сэр-Од дэлхийн чансааны 66 дугаарт эрэмбэлэгдсэнээр ДАШТ-д оролцох эрхтэй болсон. Түүний хувьд 12 дахь удаагаа ДАШТ-д уралдах болзлоо хангаж буй нь энэ юм. Марафон гүйлтээр 12 удаа ДАШТ-д оролцсон тамирчин дэлхийд байхгүй. 2023 онд ДАШТ-ий марафон гүйлтэд Б.Сэр-Од гавьяат 11 дэх удаа уралдсан, дэлхийн цор ганц тамирчин болж, Гиннессийн дээд амжилтын эзэн болж байлаа. Өдгөө 44 настай тэрбээр ДАШТ-ий бэлтгэлээ Япон улсад хангаж байгаа аж.
Үүнээс гадна эрэгтэйчүүдийн ангилалд олон улсын хэмжээний мастер Ц.Бямбажав 82 дугаар байрт жагссан үзүүлэлтээр Токиог зорихоор болжээ. Харин эмэгтэйчүүдээс олон улсын хэмжээний мастер Б.Мөнхзаяа, Г.Хишигсайхан нар ДАШТ-д өрсөлдөх эрхээ авсан байна. ДАШТ-ий марафон гүйлтийн эмэгтэйчүүд ирэх сарын 14-нд, эрэгтэйчүүд 15-нд уралдах хуваарьтай байгаа юм.
Ташрамд дурдахад, 20 дахь удаагийн ДАШТ ирэх сарын 13-нд спорт алхааны 35 км-ийн уралдаанаар албан ёсоор эхэлнэ.
