Ulaanbaatar
Нүүрсний экспорт 60 орчим хувиар өсжээ
МОНГОЛЫН МЭДЭЭ | УУЛ УУРХАЙ
Улаанбаатар /МОНЦАМЭ/. Хилийн боомтуудаар нэвтрэх нүүрсний экспорт тогтвортой өсөж байна. Сүүлийн гурван 7 хоногт нийт 6919 автомашин, 2017 вагон нүүрс хилээр гарчээ. Энэ нь өнгөрсөн 8-9 дүгээр сарын гурван 7 хоногийн үзүүлэлттэй харьцуулахад 60 орчим хувиар өссөн байна.
Засгийн газар, УУХҮЯ-аас нүүрсний экспортын хэмжээг нэмэгдүүлэх зорилгоор хилийн боомт, улсын хилийн бүс, зурвас газруудад чингэлэгт тээврийн терминал байгуулах ажлыг шуурхай хэрэгжүүлсний үр дүнд 2 сарын хугацаанд Гашуунсухайт дахь чингэлэгт тээврийн терминалыг төр-хувийн хэвшлийн хамтын ажиллагааны хүрээнд байгуулж ашиглалтад оруулаад байна.
Гашуунсухайт боомтоор нүүрсийг чингэлгээр тээвэрлэснээр хилийн нэвтрэлт нэмэгдэж, экспорт өсөж, нүүрсний чанар алдагдахаас сэргийлэн, байгаль орчинд үзүүлж буй сөрөг нөлөөлөл багасах давуу талтай юм. Монгол Улс, БНХАУ-ын хил хооронд богинын рейсээр нүүрс тээвэрлэснээр экспорт одоогийнхоос жилд 8-10 сая тонноор нэмэгдэж, улс орон нутгийн төсөвт төвлөрөх татвар, хураамж нэмэгдэх тооцоо судалгаа гараад байна.
