Ulaanbaatar
Эрчим хүчний яамны Шинжлэх ухаан, технологийн зөвлөл хуралдав
МОНГОЛЫН МЭДЭЭ | ЭДИЙН ЗАСАГ
Улаанбаатар /МОНЦАМЭ/. Эрчим хүчний яамны Шинжлэх ухаан, технологийн зөвлөлийн 2020 оны V хуралдаан баасан гарагт /2020.12.18/ болж, хуралдааныг Эрчим хүчний дэд сайд М.Баярмагнай удирдан явууллаа.
Хуралдаанаар бүс, орон нутгийн цахилгаан хангамжийг найдваржуулах хүрээнд хэд хэдэн асуудлыг хэлэлцэв. Тухайлбал, Тавантолгойн 450 МВт хүчин чадалтай цахилгаан станц барих техник, эдийн засгийн үндэслэл /ТЭЗҮ/, Өмнөговь аймгийн Нарийн сухайтад барих 2х15 МВт цахилгаан станцын ТЭЗҮ, Хэнтий аймгийн Батноров сумын Бэрх тосгоны дулааны станцын ТЭЗҮ болон бусад асуудлыг хэлэлцэн шийдвэрлэсэн.
Мөн 6, 10, 15 кВ-ын
хүчдэлтэй цахилгаан дамжуулах агаарын шугам /ЦДАШ/-ын нөлөөлөлд шувуу өртөхөөс
хамгаалах шаардлагыг хэлэлцэн шийдвэрлэв. ЦДАШ-ын тулгуурын бүтцийг шувуудад
ээлтэй байлгах үүднээс дараах аргуудыг хэрэглэх нь зүйтэй бөгөөд тусгаарлах
материал нь -50 хэмээс +70 хэмийн температур болон 6-15 кВ-ын хүчдэлийг
тэсвэрлэх чадвартай, 25-35 жилийн ашиглалтын хугацаатай, 40 м/секунд хүртэл
салхинд тэсвэртэй, хөнгөн байх шаардлагыг багтаажээ.
Эрчим хүчний яамны Шинжлэх
ухаан, технологийн зөвлөл 30 гишүүнтэйгээс халдвар хамгааллын дэглэм дор 25
гишүүн нь хоёр заалнаас, 5 гишүүн цахимаар нэгдэж хуралдсан байна.
Related news
