Ulaanbaatar
Голдман Сакс: Нефтийн үнэ энэ онд 50 долларт хүрнэ
ДЭЛХИЙН МЭДЭЭ | ЭДИЙН ЗАСАГВАШИНГТОН./TASS/. Энэ оны хоёрдугаар хагаст нэг баррель нефтийн үнэ 50 долларт хүрч өсөх бол 2017 оны эхээр бага зэрэг буураад тухайн оны эцэс гэхэд эргээд өсч 60 долларт хүрэх төлөвтэй байна гэж АНУ-ын хөрөнгө оруулалтын хамгийн том сангуудын нэг болох “Goldman Sachs” таамаглаж байгааг Блүүмбэрг агентлаг уламжилсан байна.
Таамаглалд дурдсанаар, хэд хэдэн шалтгаанаас үүдэн нефтийн хэт олборлолт "гэнэт зогссон" ажээ. Шалтгаанууд гэдэгт Канадад ойн түймэр дэгдсэн, Нигерийн нефть дамжуулах хоолой руу халдсан зэрэг үйл явдлуудыг оруулан дурдаж байна.
Голдман Сакс-ийн шинжээчдийн үзэж байгаагаар, энэ оны туршид нэг өдөрт олборлох нефтийн хэмжээ 1,4 сая баррелиар нэмэгдэхээр байна. Өмнө нь уг өсөлтийг өдөрт 1,2 сая орчим баррель байх болов уу хэмээн таамаглаж байжээ.
Энэ оны хувьд дэлхий даяар нефтийн хомсдолын хэмжээ өдөрт 400 мянга орчим баррель байна гэж Голдман Сакс тооцоолж байгаа аж. Өмнө нь өдөрт 900 мянган баррель нефть дутагдана хэмээн таамаглаж байсан юм. Хомсдол бага байгаа нь АНУ, Ирак, Иран улсууд болон Умард тэнгист нефтийн олборлолт төсөөлж байснаас илүү хэмжээгээр өссөнтэй холбоотой ажээ. Ингэснээр нефтийн зах зээл дээр эрэлт, нийлүүлэлтийн харьцаа дахин тэнцвэржих үйл явц эхэлж байгааг шинжээчид онцоллоо.
“Голдман Сакс”-аас гадна Morgan Stanley ("Морган стэнли"), Barclays ("Барклиз"), Bank of America ("Бэнк оф Америка") зэрэг Америкийн банкуудын эдийн засагчид мөн адил “газрын тосны нийлүүлэлт буурснаар зах зээл дээр дахин тэнцвэржилтийн үйл явц эхэлнэ” гэдэгтэй санал нэг байна.
Д.Нямтулга
