Пропорциональ тогтолцоотой холбоотой заалтыг хүчингүй болголоо
МОНГОЛЫН МЭДЭЭҮндсэн хуулийн Цэцийн дунд суудлын өнөөдрийн хуралдаанаар Сонгуулийн тухай хуультай холбоотой заалтыг авч хэлэлцээд пропорциональ тогтолцооны заалтыг хүчингүй болголоо.
Иргэн Ц.Намсрай, Д.Банзрагч нар өнгөрсөн оны арванхоёрдугаар сард УИХ-аас баталсан Сонгуулийн тухай хуулийн долдугаар зүйлийн 7.1.1 дэх заалтад “хувь тэнцүүлсэн /пропорциональ/;”, 120 дугаар зүйлийн 120.3 дахь хэсэгт “Улсын Их Хурлын 48-аас илүүгүй гишүүнийг олонхийн сонгуулиар, 28-аас илүүгүй гишүүнийг хувь тэнцүүлэх сонгуулиар тус тус сонгоно” гэсэн нь Үндсэн хуулийн холбогдох заалтыг зөрчсөн гэж үзэн цэцэд гомдол гаргасан.
Энэ гомдлыг авч хэлэлцээд УИХ-ын сонгуулийг хувь тэнцүүлсэн буюу пропорциональ хэлбэрээр явуулах боломжийг Үндсэн хуулиар хүлээн зөвшөөрөөгүй, харин аль нэг намд бус нэр дэвшигч иргэнд өөрт нь саналаа өгч УИХ-ын гишүүнийг сонгох үзэл баримтлалыг тогтоосон хэмээн цэц үзжээ. Ингэснээр Сонгуулийн тухай хуулийн долдугаар зүйлийн 7.1.1 дэх заалтад “хувь тэнцүүлсэн /пропорциональ/”. 120 дугаар зүйлийн 120.3 дахь хэсэгт “Улсын Их Хурлын 48-аас илүүгүй гишүүнийг олонхийн сонгуулиар, 28-аас илүүгүй гишүүнийг хувь тэнцүүлэх сонгуулиар тус тус сонгоно” гэсэн заалт өнөөдрөөс хүчингүй болов.
Б.Туул