Налайхын зам 81 хувийн гүйцэтгэлтэй байна

МОНГОЛЫН МЭДЭЭ | НИЙГЭМ
munkhbaatar@montsame.gov.mn
2021-06-05 22:19:38
@s_munkhbaatar

Улаанбаатар /МОНЦАМЭ/. Налайхаас Гачууртын уулзвар хүртэлх 20.9 км авто замын ажил 81 хувьтай үргэлжилж байна.


Тодруулбал, Налайхаас хот руу чиглэсэн авто замын өнгө хучих ажил бүрэн хийгдсэн. Харин Баянзүрхийн гүүрнээс Налайх чиглэлд замыг хэсэгчлэн хааж, хучих ажлыг хийж буйг холбогдох албаныхан мэдээллээ.



Нийслэлийн Авто замын хөгжлийн газрын орлогч дарга Г.Баттогтох, “2020 онд нэг чиглэлийн замынхаа өнгө хучих ажлыг хийсэн юм. Ноднин есдүгээр сарын 15-наас нэг сар хагас ажиллаж, цар тахалтай холбоотойгоор ажил хийгдээгүй. Харин энэ жилийн ажил өнгөрсөн тавдугаар сарын 20-нд эхэлсэн. Өдгөө өнгө хучих ажил үргэлжилж байна. Дөрвөн эгнээ бүхий 20.9 км замын ажлын хүрээнд туслах 3.7 км зам, 38 цэгт ус зайлуулах хоолой, 21 метр урт гүүр, мал, амьтанд зориулсан болон машин гарах тус бүр нэг нүхэн гарц хийхээс өнгө хучих ажил үлдсэн. Зургаадугаар сарын 30-нд өнгө хучих ажлыг дуусгахаар төлөвлөж байна. Үлдэгдэл ажлыг долоодугаар сард багтаан хийж дуусгана” гэв.



Өнөөдрийн байдлаар, хятад, монгол 170 орчим ажилтан өнгө хучих, туузан хашлага, гялбаа сарниулагч суурилуулах, ус зайлуулах хоолойн амсрын бэхэлгээ тавих зэргийг гүйцэтгэж байгаа аж.



Тус замын ажилд зөвлөх үйлчилгээ үзүүлж байгаа “Мөнхөд ашдын зам” ХХК-ийн зөвлөх Д.Нанзаддорж, “Бид замын технологи, ажлын чанар, явцад хяналт тавьж, 10 хүний бүрэлдэхүүнтэй ажиллаж байна. Замын чанар сайн байгаа” гэлээ.


Налайхын замын өргөтгөл, шинэчлэлийн ажлыг Хятадын Засгийн газрын хөнгөлөлттэй зээлийн хөрөнгөөр хийж байгаа юм.

Холбоотой мэдээ