ӨМНӨГОВЬ: Он гарсаар зам тээврийн ослоор 30 хүн амиа алджээ

ОРОН НУТГИЙН МЭДЭЭ | ӨМНӨГОВЬ
galt.deegii@gmail.com
2022-12-01 15:59:58

Өмнөговь/МОНЦАМЭ/ Замын хөдөлгөөний аюулгүй байдлыг хангахад нутгийн өөрөө удирдах байгууллага, төрийн болон төрийн бус байгууллагын оролцоог нэмэгдүүлэх нь” сэдэвт бүсчилсэн сургалт, зөвлөгөөнийг Даланзадгад хотноо 11 дүгээр сарын 30-ны өдөр зохион байгууллаа.


Тус зөвлөгөөн бүсчилсэн хэлбэрээр 21 аймагт зэрэг эхэлжээ. Говийн бүсийн зөвлөгөөнд Өмнөговь, Дундговь, Дорноговь, Говьсүмбэр, Багахангай дүүргийн Гэмт хэргээс урьдчилан сэргийлэх зөвлөл, Ажлын алба, Авто тээврийн үндэсний төв,  Прокурорын байгууллагууд оролцсон юм.


Сургалт, зөвлөгөөний хүрээнд нутаг дэвсгэр хариуцсан цагдаагийн газрын алба хаагчдад Шүүхийн шинжилгээний үндэсний хүрээлэн, Тээврийн цагдаагийн албаны сургагч багш нар танхимаар Зам тээврийн хэрэг, ослыг шалгах ажиллагаа, Тээврийн хэрэгслийн болон авто замын аюулгүй байдалд тавих хяналт, Гэмт хэрэг, зөрчлөөс урьдчилан сэргийлэх ажилд төрийн болон төрийн бус байгууллагыг татан оролцуулах, хүүхдийг зам тээврийн ослоос хэрхэн сэргийлэх гэсэн сэдвүүдээр сургалтыг явуулсан бол Тээврийн прокурорын газраас Зам тээврийн хэрэг, ослыг шалгахад анхаарах асуудал сэдвээр цахимаар сургалт зохион байгууллаа.


Өмнөговь аймгийн хэмжээнд 2022 оны байдлаар 210 зам тээврийн осол бүртгэгдэж 30 хүний амь хохирч, 28 хүн бэртсэн тоон үзүүлэлт гарчээ. Энэ нь жолооч нарын хариуцлагагүй байдал, бүрэн бус тээврийн хэрэгслээр хөдөлгөөнд оролцох, согтуугаар жолоо барьж хурд хэтрүүлэх, тээврийн хэрэгслийн гэрэл дохиог буруу ашиглах, гүйцэд түрүүлэх үйлдлийг дүрмийн бусаар хийх зэрэг алдаа дутагдал их гаргадгаас үүдэлтэй. Энэхүү хариуцлагагүй байдлаас шалтгаалан амиа алдах, бэртэж хохирох аюулд орж байгааг албаны хүмүүс анхаарууллаа. 

Related news