Ulaanbaatar
Жендэрийн эрх тэгш байдлыг хангах салбар дундын стратеги төлөвлөгөөг батлав
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Жендэрийн үндэсний хорооны ээлжит хуралдаан өчигдөр буюу энэ сарын 24-нд Төрийн ордонд болов.
Төрийн болон ТББ-ын тэнцүү оролцоог хангасан 35 гишүүнтэй уг хорооны хуралдааныг тус хорооны орлогч дарга, Хөдөлмөр, нийгмийн хамгааллын сайд А.Ариунзаяа даргалсан бөгөөд хуралдаан Ерөнхий сайдын зөвлөх, Хэвлэлийн төлөөлөгч Ч.Болортуяа болон хорооны гишүүдийн 80 хувийн ирцтэй боллоо.
Хуралдаанаар хорооны 2021 оны үйл ажиллагааны хэрэгжилт, ЖҮХ-ны дэргэдэх салбар зөвлөл (14), салбар хороод (31)-ын жендэрийн эрх тэгш байдлыг хангах үйл ажиллагааны явц, үр дүнгийн тайлантай танилцаж, 2022 онд хэрэгжүүлэх үйл ажиллагааны төлөвлөгөөний төслийг хэлэлцэн батлав. Түүнчлэн Ажлын албанаас Жендэрийн эрх тэгш байдлыг хангах тухай хуулийн 18 дугаар зүйлийн 18.3.1, 18.3.2, Хөгжлийн бодлого, төлөвлөлт, түүний удирдлагын тухай хуулийг хэрэгжүүлэх хүрээнд “Алсын хараа -2050” Монгол Улсын урт хугацааны хөгжлийн бодлогыг дэмжсэн “Жендэрийн эрх тэгш байдлыг хангах салбар дундын стратеги төлөвлөгөө (2022-2031)”-ний төслийг танилцуулан, гишүүдийн 100 хувийн саналаар баталлаа.
Жендэрийн үндэсний хорооноос 2022 онд хэрэгжүүлэх үйл ажиллагааны төлөвлөгөөнд эрэгтэйчүүдэд тулгамдаж буй тодорхой асуудлуудыг шийдвэрлэх, эмэгтэйчүүдийн хөдөлмөр эрхлэлтийг дэмжих, шийдвэр гаргах түвшин дэх эмэгтэйчүүдийн оролцоог нэмэгдүүлэх, улс төр, эдийн засаг, нийгмийн амьдралын бүх хүрээнд эрэгтэй, эмэгтэй хүмүүс, охид, хөвгүүдийн тэгш оролцоог дэмжих гурван зорилт бүхий 36 ажлыг тусгажээ. Цаашид стратеги төлөвлөгөөнд тусгагдсан тодорхой асуудлаар Жендэрийн үндэсний хорооны гишүүдийн уулзалт, семинарыг зохион байгуулах хамтын ажиллагааг эрчимжүүлэх чиглэлд анхаарахаар гишүүд санал нэгдлээ.
