Улаанбаатар
ЗАВХАН: Газрын дуудлага худалдаанаас төвлөрсөн орлогыг тухайн сум захиран зарцуулна
ОРОН НУТГИЙН МЭДЭЭ | ЗАВХАН
Улиастай, 2024 оны дөрөвдүгээр сарын 8 /МОНЦАМЭ/. Завхан
аймаг энэ жил 15 суманд 21.437 га газрыг 207 иргэнд өмчлүүлэхээр төлөвлөсөн
байна.
Харин 43.759.99 га газрыг хот тосгоны ангилал руу шилжүүлэхээр шийдвэрлэж аймгийн ИТХ-ын 15-р хуралдаанаар тогтоолын төсөл 100 хувийн саналаар дэмжигдлээ.
Аймгийн ИТХ-ын 15-р хуралдаанаар 2024 онд аймгийн хэмжээнд иргэдэд өмчлүүлэх газрын хэмжээ, байршил зориулалтын саналыг Засгийн газарт уламжлах тухай, Хот суурин газрын суурьшлын бүсийн тэг гортигийг тогтоох, Газрын нэгдмэл сангийн ангилалд шилжүүлэх тухай асуудлыг хэлэлцсэн. Ингээд хот суурин газрын суурьшлын бүсийн тэг гортигийг тэлэх, шинэчлэн тогтоох, газрын нэгдмэл сангийн ангилал шилжүүлэх саналыг Засгийн газарт уламжлах тухай тогтоолыг холбогдох газарт хүргүүллээ.
Газрын нэгдмэл сангийн ангилалд шилжүүлснээр бэлчээрийн газарт төлөвлөлтгүй, эмх замбараагүй хийдэг газар олголтыг журамлаж, хяналт тавих боломж бүрдэх юм.
Мөн 2022 онд газрын дуудлага худалдааны орлогыг төвлөрүүлэх, хуваарилах, зарцуулах, тайлагнах журмыг шинэчлэн баталсан. Энэ тогтоолоор газрын дуудлага худалдаанаас төвлөрсөн орлогыг тухайн сум 100 хувь захиран зарцуулах эрхтэй болсон юм.
2023 онд газар зохион байгуулалтын төлөвлөгөөнд тусгагдсан 122 нэгж талбарт дуудлага худалдаа зохион байгуулахаар төлөвлөж, 75 нэгж талбарт 3520 га газрын дуудлага худалдааг газрын цахим биржид /www.mle.mn/-ээр зохион байгуулсан.
Дуудлага худалдаанд 122 оролцогч оролцож 193.077.672 төгрөгийг
Төрийн санд төвлөрүүлсэн байна гэж аймгийн Газрын харилцаа барилга хот
байгуулалтын газраас мэдээлэв.
