Ulaanbaatar
ОРХОН: Хяналт, шалгалтаар 32 тээврийн хэрэгсэл даац хэтрүүлсэн зөрчил гаргажээ
ОРОН НУТГИЙН МЭДЭЭ | ОРХОН
Баян-Өндөр, 2024 оны дөрөвдүгээр сарын 2 /МОНЦАМЭ/. Улсын
болон орон нутгийн чанартай авто замын хөдөлгөөнд оролцож буй автотээврийн
хэрэгслийн даацад хяналт, шалгалт хийж байна.
Зам тээврийн хөгжлийн сайдын тушаалаар өнгөрсөн
сарын 20-ноос энэ сарын 20-ны өдөр хүртэл автотээврийн хэрэгслийн байдалд тавих ерөнхий
шаардлага MNS 4598:2020 стандартад заасан автотээврийн хэрэгслийн бүх жингийн
зөвшөөрөгдөх дээд хэмжээнээс хэтэрсэн задрах боломжгүй ачаа тээвэрлэлтийг
зогсоосон.
Аймгийн хэмжээнд өнгөрсөн сарын 22-ноос 69 тээврийн хэрэгсэлд хяналт, шалгалт хийснээс 32 нь даац хэтрүүлсэн зөрчилтэй байсан талаар Авто замын хяналтын улсын байцаагч
Ш.Сүнжидмаа хэллээ.
Мөн тэрбээр, 2024 оноос өмнө авто замын даац хэтрэлтийг
хянаж, шалгах боломжгүй байсан. Өнгөрсөн онд орон нутгийн
төсвөөс даац хэмжигч пүү авсан нь зөв ажил болсон гэдгийг
онцлов.
Стандартад зааснаар хоёр тэнхлэгтэй тээврийн хэрэгсэл 18
тонн, гурван тэнхлэгтэй тээврийн хэрэгсэл 25 тонн, дөрвөн тэнхлэгтэй тээврийн
хэрэгсэл 32 тонн, таван тэнхлэгтэй тээврийн хэрэгсэл 38 тонн, зургаан
тэнхлэгтэй тээврийн хэрэгсэл 44 тонн ачаа тээвэрлэх ёстой.
Зөрчил гаргасан иргэн, аж ахуйн нэгж байгууллагуудыг Автотээврийн болон Зөрчлийн тухай хуулийн хүрээнд арга
хэмжээ авч байгаа аж. Мөн даац хэтрүүлсэн тээврийн хэрэгслийн ачааг өөр
тээврийн хэрэгсэлд шилжүүлж, зөвшөөрөгдсөн даацаар цааш хөдөлгөөнд
оролцуулах зэрэг арга хэмжээг авч байна.
Дулааны улирал эхэлснээр газрын хөрс, замын
далангийн өнгөн хэсэг гэсдэг. Үүнээс улбаалан авто замд ус чийг ихээр
хуримтлагдаж, тээврийн хэрэгслүүд даац хэтрүүлсний улмаас авто замд эвдрэл
үүсэх томоохон шалтгаан болдог юм.
Шалгалтыг Орхон аймгийн Засаг даргын Тамгын газрын Хууль зүйн хэлтэс, Замын цагдаагийн газар, Автотээврийн үндэсний төв "Орхон АЗЗА" ХХК хамтран хийж байна.
