Ulaanbaatar
"Цаст алтайн жинчин" компани малчдад өвс хандивлав
ОРОН НУТГИЙН МЭДЭЭ | ХОВД
Ховд аймгийн баруун гурван сум Үенч, Алтай, Булган сумдад цас их орсноос болж, малчид цагаан зудын байдалд орсон нь анхаарлын төвд байсаар байна.
Тэгээд ч улсын хэмжээнд өвөлжилт хүндэрсэн сумдын малчдад туслах хандивын аяныг ХХААХҮЯ-аас санаачилан зохион байгуулж, манай аймаг хандивын аянд нэгдэж өвөлжилт хүндэрсэн гурван сумдад тусламж үзүүлсээр байна.
Тун саяхан Цаст-Алтайн жинчид ХХК-ны тээвэрчид “Нэг иргэн-нэг боодол өвс” уриад дор нэгдэн өвөлжилт хүндэрсэн Булган суманд 750 боодол өвс хандивлан, өөрийн унаагаар хүргэж өгсөн байна.
Ийнхүү малчдад чин сэтгэлийн тусламж үзүүлж байгаа Цаст-Алтайн жинчид ХХК-ны ажилчид, тээвэрчдэд аймгийн Хөгжлийн бодлого хариуцсан Засаг даргын орлогч Ш.Батсүх Булган сумын малчид, Ховдчуудынхаа өмнөөс талархал илэрхийллээ.
Ховд аймгийн хувьд өнөтэй өвөл болж байгаа хэдий ч зарим сумдын нутгаар цас орохгүй байгаа учир хараар өвөлжиж мал амны усгүй болж харын зуд болж байна гэж зарим хашир малчид хэлж байна.
А.Бямбасүрэн
