Ulaanbaatar
АНУ-ын Техас мужийн тойргийн шүүхийн шүүгч нарыг хүлээн авч уулзлаа
МОНГОЛЫН МЭДЭЭ | УЛС ТӨР
Улаанбаатар, 2025 оны тавдугаар сарын 22 /МОНЦАМЭ/. УИХ-ын Ерөнхий нарийн бичгийн дарга Б.Баасандорж АНУ-ын Техас мужийн тойргийн шүүхийн шүүгч, профессор Мэтью Райт, Чарлез Вановер тэргүүтэй тус мужийн “Spurlock Judicial Fund” сангийн төлөөгчдийг өчигдөр хүлээн авч уулзлаа.
Тус сан Монголын
өмгөөлөгчдийн холбоо, “Өмгөөлөгчдийн үйл ажиллагааг дэмжих төв” ТББ болон АНУ дахь “Ганзориг
консалтинг” хуулийн фирмтэй хамтран
эрүүгийн хэргийг тохиролцоогоор буюу хялбаршуулах шийдвэрлэх ажиллагааны талаар сургалт, судалгааны ажлыг явуулж байна. Ерөнхий нарийн
бичгийн дарга Б.Баасандорж УИХ-ын 2024 оны ээлжит сонгуулийн үр дүнд Монголын парламент 126 гишүүнтэй бүрдсэн бөгөөд Хууль зүйн байнгын хороонд чадварлаг хуульч гишүүд ажиллаж
байгааг танилцуулж, Эрүүгийн хэрэг хянан шийдвэрлэх тухай Монгол Улсын хуулийн
Хялбаршуулсан журмаар хэрэг хянан шийдвэрлэх ажиллагааны тухай 17 дугаар
бүлгийг хэрэгжүүлэх чиглэлээр хамтран ажиллана гэдэгт итгэлтэй байгаагаа
илэрхийлэв. Тэрбээр Монгол, АНУ-ын хууль, шүүхийн байгууллагуудын хамтын
ажиллагаанд талархалтай байгаагаа тэмдэглэж, дэмжиж хамтран ажиллахад бэлэн
байна гэлээ.
Профессор Мэтью Райт хамтын ажиллагааны
хүрээнд эрүүгийн хэргийг тохиролцоогоор шийдвэрлэх ажиллагааны талаарх сургалтыг АНУ болон Монгол
Улсад тус бүр 3-4 удаа зохион байгуулсныг танилцуулж, харилцан шүүгч,
өмгөөлөгч, хуульчдыг солилцон, бодит туршлагыг судлуулах практик сургалт
ихээхэн үр дүнтэй болж буйг онцоллоо. Хоёр улсын хуулийн зохицуулалт харилцан
адилгүй байгаагаас шалтгаалж тус улсын шүүхэд эрүүгийн хэргийг хялбараар шийдвэрлэж буй сайн туршлагыг Монгол Улсын шүүхийн
хэрэглээнд нэвтрүүлэхэд зарим хүндрэл учирч буйг уулзалтын үеэр шүүгч нар
дурдсан юм. Иймд уг асуудлаар иж бүрэн, цогц судалгаа хийж, санал
боловсруулахаар ажиллаж байгааг өгүүлж, үүнд дэмжлэг үзүүлэхийг хүсэв. Ерөнхий
нарийн бичгийн дарга Б.Баасандорж Улсын Их Хурлын Тамгын газрын дэргэд
Парламентын судалгаа, хөгжлийн хүрээлэн бие даасан статустай ажиллаж
байгааг танилцуулж, тус хүрээлэнтэй хамтран ажиллахыг зөвлөлөө.
Уулзалтад УИХ-ын Тамгын газрын Хуулийн газрын дарга
Ч.Дондогмаа, АНУ дахь “Ганзориг консалтинг” хуулийн фирмийн захирал, Монгол Улсын Дээд
шүүхийн шүүгч асан Г.Ганзориг, Монголын өмгөөлөгчдийн холбооны Мэргэшлийн
хорооны дарга Д.Батсүх нар
байлцлаа гэж УИХ-ын
Хэвлэл мэдээллийн газраас мэдээлэв.
