Ulaanbaatar
“Гүйцэтгэлийн аудитын чадавхыг сайжруулах” төслийн удирдлагыг хүлээн авч уулзжээ
МОНГОЛЫН МЭДЭЭ | НИЙГЭМ
Улаанбаатар, 2025 оны есдүгээр сарын 25 /МОНЦАМЭ/. Аудитын дээд байгууллагуудын Олон улсын байгууллага /ИНТОСАИ/-ын хөгжлийн санаачилга Аи Ди Аи болон Азийн хөгжлийн банкнаас Монгол Улсын Төрийн аудитын байгууллагад “Гүйцэтгэлийн аудитын чадавхыг сайжруулах” төслийг хамтран хэрэгжүүлж байгаа юм.
Энэ хүрээнд манай улсын ерөнхий аудитор С.Магнайсүрэн Аи Ди Аи-ын ерөнхий захирлын орлогч Арчана Ширсат, ахлах менежер Марита Салгрейв нарыг хүлээн авч уулзжээ. Тэрбээр уулзалтын эхэнд “Бид үйл ажиллагаандаа цахим шилжилтийг нэвтрүүлэх тэргүүлэх зорилт дэвшүүлсэн. Мөн улс орны хэмжээнд хэрэгжүүлж буй хөгжлийн томоохон төсөл хөтөлбөрүүдэд урьдчилсан аудит хийж, эрсдэлээс сэргийлэх, аудитын шийдвэрийн хэрэгжилтийг сайжруулах талаар онцгойлон анхаарч, стратеги төлөвлөгөөндөө тусгахаар төлөвлөж байна” хэмээн ярьжээ. Түүнчлэн эдгээр зорилтоо хэрэгжүүлэхэд нөөцийг зөв хуваарилах, албан хаагчдыг чадавхжуулах, үйл ажиллагаандаа ёс зүйн өндөр хариуцлагыг төлөвшүүлэхэд Аи Ди Аи-тай хамтран ажиллаж, үр дүнд хүрэх нь чухал болохыг онцоллоо.
Харин Арчана Ширсат Монгол Улсын Төрийн аудитын байгууллагад хэрэгжүүлж байгаа “Гүйцэтгэлийн аудитын чадавхыг сайжруулах” төсөл нь аудитын чиглэлээр хамтран ажиллаж байгаа анхны төсөл гэдгийг тодотгоод, хэрэгжилтийн явц, үр дүнд сэтгэл хангалуун байгаагаа илэрхийллээ. Мөн энэ удаагийн уулзалтаар төслийн явцтай танилцахаас гадна үр дүнг цаашид ч тогтвортой хэрэгжүүлэх үйл явцыг тал бүрээс нь хэлэлцэн, талуудын хариуцлага оролцоог нэмэгдүүлж, хамтын ажиллагааг дахин нэг шат ахиулах нь чухал ач холбогдолтойг хэлсэн байна.
