Ulaanbaatar
Фужянь мужаас үлэг гүрвэлийн “бүжгийн талбай” илрүүлжээ
ДЭЛХИЙН МЭДЭЭ | НИЙГЭМ
ФУЖОУ. /Xinhua/. БНХАУ-ын судлаачид зүүн нутгийн Фужянь мужийн
Шаньган тойргоос үлэг гүрвэлийн маш олон тооны мөр бүхий “үлэг гүрвэлийн
бүжгийн талбай” илрүүлжээ.
“Энэхүү “бүжгийн
талбай” нь 100 метр хавтгай дөрвөлжин талбайг хамарсан малтлагын газар байсан
бөгөөд анх үлэг гүрвэлийн 200 орчим мөр илрүүлээд байсан” гэж Хятадын Газарзүйн
шинжлэх ухааны их сургуулийн палеонтологич, судалгааны багийн гишүүн Шин Лида
мэдээлсэн байна.
Үлэг гүрвэлийн
мөрүүдийг анх өнгөрсөн 11 дүгээр сард олсон бөгөөд тухайн үед 240 гаруй мөр илрүүлжээ.
Харин дөрөвдүгээр сарын эхээр өөр 364 мөр олсон байна. Одоогийн байдлаар 1600
орчим хавтгай дөрвөлжин метрийг хамарч буй талбайгаас үлэг гүрвэлийн 600 гаруй
мөр илрүүлжээ. Энэхүү газар нь Шаньган тойргийн Луншян тосгонд байрладаг
байна.
Шин Лидагийн
мэдээлснээр, малтлагын ажил үргэлжлэх тусам үлэг гүрвэлийн мөрийн тоо олширч,
1000 давах төлөвтэй байгаа ажээ. 80 сая жилийн настай эдгээр мөрийг Сауропод, том
жижиг Теропод, Орнитопод зэрэг наад зах нь найман үлэг гүрвэлийнх гэж үзэж
байгаа гэнэ.
Шинээр илрүүлсэн
мөрүүдийн дунд урт хүзүү, сүүлтэй, 20 метр өндөр биетэй, өвсөн тэжээлт том
Сауроподын мөр байжээ. Мөн 10 см хүрэхгүй урттай хөлийн мөрийг нэг метр орчим
өндөртэй шувуун хөлт үлэг гүрвэлийнх гэж үзэж байгаагаа Шин Лида мэдээлжээ.
Судлаачид энэхүү
талбайг Цэрдийн галавын өмнөх үед хамаарах үлэг гүрвэлүүдийн ул мөрийг агуулсан,
Хятадаас олдсон хамгийн том, хамгийн олон төрлийн ул мөр бүхий талбай гэж үзэж
байна.
Энэхүү газрын
геологийн бүтэц нь энэ хэсэг үлэг гүрвэлүүдийн хоол хүнсээ идэж, ус
уудаг байсан ундны усны эх үүсвэртэй ойролцоо байсныг харуулж байна гэж
Фужянийн Геологийн судалгааны төвийн дэд дарга Чэнь Руньшэн мэдээлжээ. Цаашид
судалгаа үргэлжлэхийн хэрээр мөрөөс гадна бусад олдвор олдож магадгүйг тэрбээр нэмж хэлжээ.
