Ulaanbaatar
Улаанбаатар хотын хэмжээнд нийт 82 “Хүүхдийн автобус” байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Замын цагдаагийн газраас “Хүүхэд тээвэрлэх автобус ба үйлчилгээнд тавих хяналт” шалгалтыг зохион байгуулжээ.
Тус шалгалтын зорилго нь Нийслэлийн Ерөнхий боловсролын сургууль, цэцэрлэгүүдийн хүүхдийг зохион байгуулалттайгаар тээвэрлэх автобусны стандартын шаардлага, тээвэрлэлтийн нөхцөл, техникийн бүрэн бүтэн байдлыг хангасан автобусаар тав тухтай аюулгүй тээвэрлэх нөхцлийг бүрдүүлэхэд чиглэсэн байна.
Нийслэлийн хэмжээнд төрийн болон хувийн хэвшлийн 214 орчим ерөнхий боловсролын сургууль үйл ажиллагаа явуулж байгаа үүнээс шалгалтанд 44 сургууль, нэг цэцэрлэг, нэг сургалтын төвийн нийт 82 автобус хамрагджээ. Тухайлбал, Баянзүрх дүүрэг 13 сургуулийн 21 автобус, Баянгол дүүрэг 7 сургуулийн 10 автобус, Сонгинохайрхан дүүрэг 3 сургуулийн 3 автобус, Сүхбаатар дүүрэг 12 сургууль, 1 сургалтын төвийн 30 автобус, Чингэлтэй дүүрэг 1 сургуулийн 1 автобус, Хан-Уул дүүрэг 5 сургуулийн 13 автобус, Налайх дүүрэг 2 сургууль, 1 цэцэрлэгийн 3 автобус, Багахангай дүүрэг 1 сургуулийн 1 автобус хамрагдсан байна.
Үүнээс 90,2 хувь нь буюу 74 автобус насжилтаар, 22 хувь буюу 18 автобус нь шар өнгөтэй байх шаардлагаар тэнцсэн боловч хэрэглээний стандартын шаардлагыг зөрчсөн зөрчлүүд илэрсэн байсныг арилгуулахаар “Зөвлөмж” хүргүүлжээ. 2017-2018 оны хичээлийн жилд нийт 82 автобус хамрагдаж өмнөх оны мөн үеэс хүүхдийн автобусны тоо 24 хувиар буурсан үзүүлэлттэй ч өмнөх жилүүдтэй харьцуулахад хөдлөх бүрэлдэхүүний парк шинэчлэлт хийгдсэн, техникийн бүрэн бүтэн байдал илт сайжирсан байв.
Цаашид Ерөнхий боловсролын сургууль, цэцэрлэгүүд сурагчдыг нэгдсэн зохион байгуулалттай “Хүүхдийн автобус”-аар тээвэрлэх ажлыг зохион байгуулах шаардлагатай юм. Энэ нь бага насны хүүхдийн аюулгүй байдал хангах, түгжрэл саатал, агаарын бохирдлыг бууруулах, зэрэгт чухал нөлөөтэй. Мөн эцэг эхчүүд хүүхдийн автобусны үйлчилгээнд тогтмол хяналт тавьж байх, сургууль, цэцэрлэгийн удирдлагууд шалгалтанд тэнцээгүй, шаардлага хангахгүй байгаа автобусны жолоочтой гэрээ байгуулахгүй байхыг Замын цагдаагийн албанаас зөвлөжээ.
Д.Өлзий
