Ulaanbaatar
Тэгш бус боловсролын ялгааг арилгахад БНСУ-тай хамтран ажиллана
МОНГОЛЫН МЭДЭЭ | НИЙГЭМ
Нийслэлийн нийгмийн хөгжлийн асуудал хариуцсан төслүүдийн удирдагч, Нийслэлийн Засаг даргын орлогч Ш.Анхмаа БНСУ-ын Сөүл хотын боловсролын газрын дарга Ли Мүсү болон холбогдох албаны хүмүүсийг хүлээн авч уулзлаа.
Улаанбаатар Сөүл хотын боловсролын газрууд хамтран ажиллах “Санамж бичиг”-т гарын үсэг зурсны 10 жилийн ой энэ онд тохиож байгаа юм. Сөүл хотын Боловсролын газраас нийслэлийн сургуулиудын мэдээлэл технологийн бааз суурийг нэмэх зорилгоор уламжлал болгон жил бүр тодорхой тооны компьютерыг ЕБС-иудын мэдээлэлзүйн сургалт явуулах материаллаг баазыг бүрдүүлэх эх үүсвэр болдог байна. Нийслэлийн Засаг даргын орлогч Ш.Анхмаа “Тэгш бус бовсролын ялгааг арилгахын тулд танай улсын туршлагаас суралцаж, илүү үр дүнтэй ажиллах шинэ боломж бий болно гэдэгт найдаж байна. Энэ тал дээр анхааран жил бүр манай улсаас тодорхой тооны оюутан, сурагч болон багш нарыг сургалтад хамруулж байдагт талархаж явдаг” гэлээ. БНСУ-ын Сөүл хотын боловсролын газрын дарга Ли Мүсү “Бидний хувьд анх удаа Монголд ирж байна. Ирэхээсээ өмнө танай орны талаар ном, сэтгүүл уншиж судалсан. Монгол Улсад манай улстай төстэй зүйлс маш их байна. Тийм болохоор хамтран ажиллахад илүү дөхөм байх болов уу гэж бодож байна. Бид өөрийн улсдаа боловсролын тэгш бус байдал, ялгааг арилган ажиллаж байна. Энэ удаа бид Монголын боловсролын салбар болон сургууль цэцэрлэгийн тулгамдаад байгаа асуудлуудтай танилцаж, судлаад тухайн асуудлууд дээр нухацтай ажиллах болно” гэсэн юм гэж нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.
