Ulaanbaatar
ХӨВСГӨЛ: Бэлчээрийн даац 40 гаруй хувьд хэтэрчээ
ОРОН НУТГИЙН МЭДЭЭ | ХӨВСГӨЛ
Мөрөн, 2024 оны аравдугаар сарын 24 /МОНЦАМЭ/. Хөвсгөл аймгийн өвөл, хаврын бэлчээрийн даац нутгийн 60 орчим хувьд хүрэлцээтэй, 40 гаруй хувьд хэтэрсэн гэдгийг Ус цаг уур орчны шинжилгээний төвийн синоптик инженер Х.Цогжаргал мэдээллээ.
Бэлчээрийн даац Цагаан-Уул сумын Шарга, Бүрэнтогтох сумын Их-Уул, Төмөрбулаг сумын Тээл, Нарийн, Тосонцэнгэл сумын Тээл, Сэлэнгэ, Түнэл сумын Алтгана, Баян-Эрхэт багийн нутагт олон дахин хэтэрч улаан гарсан байгааг анхаарууллаа.
Мөн Баянзүрх, Арбулаг, Алаг-Эрдэнэ, Цагаан-Уул, Бүрэнтогтох, Төмөрбулаг, Галт, Жаргалант, Тосонцэнгэл сумын зарим багийн нутгаар 3-5 дахин хэтэрч улбар шар түвшинд гарсан байна.
Бэлчээрийн даац нь тухайн газар нутгийн бэлчээрт бэлчээж болох эсвэл бэлчээрийн хэтэрсэн малын тоог илтгэх бөгөөд энэ жилийн хувьд зуншлага харьцангуй сайн байсан нутгийн хойд, зүүн хойд хэсгээр бэлчээр хүрэлцээтэй, нөөцтэй байна.
Гэвч хүйтний улиралд гэнэт их хүйтрэх, ахиу хэмжээний цасан бүрхүүл тогтоход цасан болон мөсөн зудын нөхцөл үүсэж, мал бэлчээрлэх боломжгүй болдог.
Иймээс ирэх өвөл, хаврын бэлчээрийн даац хэтэрч гарсан сумдын нутагт өвс
хадлан, нэмэгдэл тэжээл олж нөөцлөх, отор нүүдэл хийх, малаа борлуулах, тоог
багасгах зэрэг арга хэмжээг эртнээс авч, өвөлжилт хаваржилтад бэлтгэх шаардлагатай байгааг онцоллоо.
