Ulaanbaatar
Эрүүгийн мөрдөгч, хэсгийн төлөөлөгч нарын бүсийн сургалт болж байна
ОРОН НУТГИЙН МЭДЭЭ | ӨМНӨГОВЬ
Өмнөговь /МОНЦАМЭ/ Өмнөговь аймагт говийн бүсийн эрүүгийн мөрдөгч, хэсгийн төлөөлөгч нарын сургалт болж байна.
Шинэчлэн батлагдсан Зөрчлийн тухай хууль, Зөрчил шалган шийдвэрлэх тухай хууль, Эрүүгийн хууль, Эрүүгийн хэрэг хянан шийдвэрлэх тухай хуулийн хэрэгжилтийг сайжруулах зорилгоор Цагдаагийн ерөнхий газраас энэхүү сургалтыг зохион байгуулж байгаа юм.
Сургалтанд Өмнөговь, Дундговь, Дорноговь аймаг дахь Цагдаагийн газар, Говьсүмбэр аймаг дахь Цагдаагийн хэлтсийн эрүүгийн мөрдөгч, хэсгийн төлөөлөгч нийт 88 алба хаагч хамрагдаж байна.
Сургалтын нээлтийн үйл ажиллагааг Батмөнх даян хааны нэрэмжит аймгийн төв талбайд зохион байгуулж Цагдаагийн ерөнхий газрын дэд дарга, цагдаагийн хурандаа З.Дашдаваа, Өмнөговь аймаг дахь Цагдаагийн газрын дарга, цагдаагийн дэд хурандаа Г.Наранбаатар, Өмнөговь аймгийн Засаг дарга Н.Наранбаатар болон нутгийн төр захиргааны байгууллагын удирдлагууд оролцож, “Сүлд” чуулгын болон аймгийн Цагдаагийн газрын дэргэдэх “Наран говь” хамтлагийн уран бүтээлчид ая дууны дээжээсээ өргөн барилаа.
Мөн Цагдаагийн ерөнхий газрын “Сүлд” чуулгын уран бүтээлчид Өмнөговь аймагт ажиллаж “Үргэлж тантай хамт” өдөрлөгийг зохион байгуулан, цагдаагийн алба хаагчид, иргэд, олон нийтэд уран бүтээлийн тоглолтоо толилуулах юм.
Д.Мишигсүрэн
