Ulaanbaatar
Амазоны ширэнгэн ойд хайгуул, олборлолт хийхийг Бразилын Засгийн газар зөвшөөрөв
ДЭЛХИЙН МЭДЭЭ | ЭДИЙН ЗАСАГ
РИО-ДЕ-ЖАНЕЙРО. /ВВС/. Бразилын Засгийн газар тусгай хамгаалалтад байдаг Амазоны ширэнгэн ойд хайгуул, олборлолт хийхийг зөвшөөрлөө.
Бразилын хойд нутгийн Амапа болон Пара мужуудын нутаг дэвсгэрт хамаарах 46 мянган км.кв газар нутаг нь алт болон бусад ашигт малтмалын арвин баялагтай ажээ.
Тус улсын Засгийн газраас лхагва гарагт гаргасан мэдэгдэлд “Энэ бүс дэх түүх ба соёл, байгалийн дурсгалт есөн газар цаашид ч төрийн хамгаалалтад байх болно” гэжээ.
Гэсэн хэдий ч байгаль орчин хамгаалагчид “Уул уурхайн үйл ажиллагаа тусгай хамгаалалтад байдаг дээрх есөн газар руу хальж болзошгүй” гэж эмээж байна.
Амазоны ширэнгэн ойн тусгай хамгаалалттай газар нь Данийн газар нутгаас ч том бөгөөд одоо энэ газрын 30 хувьд нь хайгуул, олборлолт хийхэд нээлттэй боллоо.
Тус улсын Уул уурхай, эрчим хүчний яам мэдэгдэхдээ “Ширэнгэн ойн тусгай хамгаалалтад байдаг бүс рүү уул уурхайн компаниудыг оруулахгүй. Шинээр хөрөнгө оруулалт татаж, улс орны эдийн засгийг сэргээж, ажлын байрыг нэмэгдүүлэхийн тулд Амазоны ширэнгэн ойн бүсэд үйл ажиллагаа явуулахыг уул уурхайн компаниудад зөвшөөрч байна” гэв.
Харин тус улсын сөрөг хүчний сенатч Рэндольф Родригес хэлэхдээ “Энэ бол сүүлийн 50 жилийн хугацаанд Амазоны сав газарт болж буй хамгийн том халдлага” гэлээ.
Бразилын Онгон байгалийг хамгаалах сангийн тэргүүн Маврико Воиводик өнгөрсөн сард “Амазоны ширэнгэн ойд хайгуул, олборлолт хийхийг зөвшөөрвөл хүн амын шилжилт хөдөлгөөний “тэсрэлт” болж, цөлжиж, усны нөөц дуусаж, биологийн төрөл зүйл алдагдаж, газрын зөрчил маргаан газар авах болно. Алтны төлөөх тэмцэл юугаар ч нөхөшгүй байгаль, түүх соёлын үнэт өвүүдийг устгах болно” гэж анхааруулж байсан юм.
Г.Доржханд
