Ulaanbaatar
ОПЕК: Газрын тосны агуулахын нөөц буурч байна
ДЭЛХИЙН МЭДЭЭ | ЭДИЙН ЗАСАГЛОНДОН. /ТАСС/. Дэлхийн өндөр хөгжилтэй орнууд дахь газрын тосны агуулахын нөөц Газрын тос экспортлогч орнуудын байгууллагын (ОПЕК) байгуулсан тохиролцооны үр дүнд буурч эхэлсэн талаар Катар улсын Эрчим хүчний сайд Мухаммед бен Салех ас-Сада мэдэгдлээ.
2016 оны 11 дүгээр сард Вена хотод болсон ОПЕК-ийн Дээд хэмжээний уулзалтын үеэр 2008 оноос хойш анх удаагаа нефть олборлолтыг хоногт 32.5 сая баррель хүртэл бууруулах шийдвэрт хүрсэн юм.
“Энэ оны гуравдугаар улирлын эцсээр нефтийн нөөц илт буурсан байх ёстой. Нефтийн нөөц АНУ-д өссөн боловч дэлхий даяар болон Эдийн засгийн хамтын ажиллагаа, хөгжлийн байгууллага (OECD)-ын гишүүн орнуудад буурч эхэлсэн” гэж Катарын Эрчим хүчний сайд хэлсэн байна. Тэрбээр мөн “өнгөрсөн онд эрэлт хоногт 1.2 сая баррелиар нэмэгдэж байсан бол энэ онд эрэлт 1.4 сая баррелиар нэмэгдэх бөгөөд цаашдаа энэ тоо өсөх болно” гэж дурдлаа.
Сайд өмнө нь “ОПЕК-ийн гишүүн орнуудын байгуулсан тохиролцооны дүнд 2017 оны сүүлчээр нефтийн зах зээл тогтворжино” гэж мэдэгдэж байсан юм. Дээр дурдсан тохиролцооны дагуу ОПЕК-ийн гишүүн орнууд олборлолтоо бууруулах амлалтаа 94 хувиар биелүүлж байгаа бол ОПЕК-ийн гишүүн бус орнуудын хувьд энэ гэрээний хэрэгжилт 50-иас доош хувьтай байна.
Б.Мишээл
