Ulaanbaatar
Томуу, томуу төст өвчний тархалт улсын хэмжээнд дэгдэлтийн түвшинд байна
МОНГОЛЫН МЭДЭЭ | ЭРҮҮЛ МЭНД
Улаанбаатар, 2025 оны арваннэгдүгээр сарын 30 /МОНЦАМЭ/. Монгол Улсын Ерөнхий сайд Г.Занданшатар Сонгинохайрхан дүүргийн нэгдсэн эмнэлэгт өчигдөр ажиллаж, томуу, томуу төст өвчний нөхцөл байдалтай танилцлаа.
Тус эмнэлэгт одоогоор 281 хүүхэд хэвтэн эмчлүүлж байна. Энэ сарын 22-24-нд хоногт 422-438 хүүхэд яаралтай тусламж авахаар ирсэн бол сүүлийн гурав хоногт яаралтай тусламжийн тасагт ирсэн хүүхдийн тоо аажмаар буурч өнгөрсөн шөнө 198 хүүхэд ирж, 58 нь хэвтжээ. Өрхийн эмнэлгүүдийг илүү цагаар ажиллуулахаар зохицуулсан нь дүүргийн эмнэлгийн ачаалал буурахад нөлөөлсөн гэж тус эмнэлгийн удирдлагууд үзэж байна.
Сонгинохайрхан
дүүргийн эмнэлэгт хэвтэж буй 281 хүүхдийн 81 хувь нь томуугийн эсрэг вакцин
хийлгээгүй хүүхдүүд байна. Тус дүүрэг 344 мянга орчим хүн амтай. Үүний 130
мянга нь хүүхэд. Энэ жил томуугийн эсрэг 27430 вакциныг зорилтод бүлэгт хийжээ.
Гэхдээ цаашид вакцины хүртээмжийг нэмэгдүүлэх шаардлагатай гэж эмнэлгийн
удирдлагууд онцлов.
Тус дүүрэг хүн ам ихтэй, хүүхдийн
өвчлөл өндөр учраас орны тоогоо 100-аар нэмж, 240 ортой болжээ. Нэмсэн 100 орны
тухайд нийслэлийн төсвийн 2.1 тэрбум төгрөгийн хөрөнгө оруулалтаар эмнэлгийн
хуучин барилгад иж бүрэн засвар хийж, өнгөрсөн мягмар гарагт ашиглалтад
оруулсан байна. Үр дүнд нь орны хүлээгдэлгүй болжээ. Мөн нэгдүгээр хороололд
байрладаг хуучнаар Хатанбаатарын гэх эмнэлгийн барилгыг засварлаж
байна. Тус эмнэлэг ашиглалтад орсноор дахин 100 ортой хүүхдийн тасагтай болох
юм. Ингэснээр дүүргийн эмнэлгийн хэмжээнд хүүхдийн ор 300 гаруй болох аж.
Томуу,
томуу төст өвчний тархалт улсын хэмжээнд дэгдэлтийн түвшинд байна. Нийт 2304
хүүхэд хэвтэн эмчлүүлж байгаа бөгөөд 88 хувь нь амьсгалын замын цочмог хүнд
халдварын шалтгаантай байна. Тус дүүргийн хэмжээнд
амьсгалын замын өвчлөл өнгөрсөн оны мөн үеийнхтэй
харьцуулахад 67 хувиар нэмэгджээ.
