Ulaanbaatar
Ойр дотны хүмүүсээ өндөр албан тушаалд томилуулсан гэх асуудлыг шалгуулахаар болжээ
МОНГОЛЫН МЭДЭЭ | УЛС ТӨРУИХ-ын дарга М.Энхболд ах дүү, амраг садангийн 20 хүнээ төрийн өндөр албан тушаалд томилсон гэх мэдээлэлтэй холбогдуулж мэдэгдэл гаргажээ. Түүнчлэн тэрбээр нэр хүндэд нь халдсан энэхүү асуудлаар хууль хяналтын байгууллагад хандана гэдгээ мэдэгдэв.
Тэрбээр, "УИХ-ын дарга нь холбогдох хууль тогтоомжид зааснаар Монголбанкны ерөнхийлөгч, Үндэсний статистикийн хорооны дарга, Үндэсний аудитын газрын ерөнхий аудитор, Санхүүгийн зохицуулах хорооны дарга, Сонгуулийн ерөнхий хорооны дарга, нарийн бичгийн дарга, Хүний эрхийн үндэсний комиссын дарга, Улсын Их Хурлын Тамгын газрын Ерөнхий нарийн бичгийн дарга гэсэн нийт 8 албан тушаалтныг томилуулахаар санал гаргах эрхтэй бөгөөд тэдгээрийг УИХ хэлэлцэн, томилох эсэхийг шийдвэрлэдэг.
Миний бие УИХ-ын даргаар сонгогдсоноос хойш дээрх албан тушаалтнуудаас хүсэлтээ өгч чөлөөлөгдсөн 3, Үндэсний статистикийн хороог дахин байгуулсантай холбогдуулан түүний удирдлага гээд нийт 4 иргэнийг тухайн албан тушаалыг эрхлэх мэдлэг, боловсрол, туршлага, ур чадвар, мэргэшсэн байдлыг шалгуур болгон УИХ-д санал болгосон. УИХ-ын даргын хувьд төрийн албан хаагч, түүн дотроо төрийн өндөр албан тушаалтныг томилох шийдвэрийг бие даан гаргах хууль, эрх зүйн үндэслэл болоод боломж байхгүй.
Харин Монгол Ардын Намын даргын хувьд намын дүрмийн хүрээнд, улс төрийн албан тушаалд томилогдох хүнийг намын бүх шатны нэгж, байгууллага болон намын Удирдах зөвлөлөөр хэлэлцэх үед санал бодлоо илэрхийлж, зөвшилцдөг. Ингэхдээ тухайн хүний мэргэжил, мэдлэг, туршлага, удирдах чадварыг нэн тэргүүний шалгуур болгон үздэг. Энэхүү шалгуурыг хангасан гэж үзэж УИХ-ын байнгын хороод, нэгдсэн чуулганы хуралдаанаар Монгол Улсын Ерөнхий сайд, Засгийн газрын гишүүдийг иргэд, олон түмний өмнө нээлттэй хэлэлцүүлж томилсныг ард түмэн мэдэж байгаа.
УИХ-ын сонгуулийн дүнгээр олонхи болсон аль ч нам сонгуульд оролцохдоо дэвшүүлсэн мөрийн хөтөлбөрөө биелүүлэх, Засгийн газрын бодлого, үйл ажиллагааны хөтөлбөр, зорилтыг зөв тодорхойлж, хэрэгжүүлэх чадавхитай боловсон хүчнээ улс төрийн албан тушаалд дэвшүүлэн ажиллуулдаг. Гэтэл Ардчилсан намын зарим гишүүд орон нутгийн сонгууль болж буйтай холбогдуулан сонгогчдын саналыг татах зорилгоор баримт нотолгоогүй, бодит үнэнд үл нийцэх, иргэд, олон нийт, сонгогчдыг төөрөгдүүлсэн мэдээллийг зохион байгуулалттайгаар тарааж байгаад харамсаж байна. Миний зүгээс өөрийн ах, дүү, төрөл садны нэг ч хүнийг төрийн өндөр албан тушаалд томилоогүй болно" гэжээ.
Б.Туул
