Ulaanbaatar
Х.Клинтонд эрүүгийн хэрэг үүсгэх шаардлагагүй гэв
ДЭЛХИЙН МЭДЭЭ | УЛС ТӨРВАШИНГТОН. /Xinhua/. Төрийн нарийн бичгийн даргаар ажиллаж байхдаа хувийн и-мэйл хаягаа албан хэрэгцээнд ашиглаж байсантай нь холбогдуулан Хиллари Клинтоныг шалгасан бөгөөд түүнд эрүүгийн хэрэг үүсгэх шаардлагагүй гэсэн дүгнэлтэд хүрлээ гэж АНУ-ын Холбооны мөрдөх товчоо /ХМТ/ мэдэгджээ.
И-мэйл-ийн дуулиантай холбогдуулан ХМТ-ны ажилтнууд тодруулга авсны дараа тус товчооны захирал Жеймс Коми өчигдөр мэдэгдэл хийсэн байна.
Коми хэлэхдээ “бид нууц мэдээлэл агуулсан 100 гаруй и-мэйл олсон. Эдгээрийн дунд “маш нууц” мэдээлэл агуулсан и-мэйл ч байгаа” гэсэн байна.
Мөн тэрбээр “гадныхан Х.Клинтоны и-мэйлүүдийг хакердсан байж болох юм” гэжээ.
Түүний хэлснээр, Х.Клинтон болон түүний хамтрагчид нууц мэдээллүүдэд туйлын хайхрамжгүй хандаж байжээ.
“Гэсэн хэдий ч тэд хуулийг санаатайгаар зөрчөөгүй. “Хууль зөрчин санаатай үйлдэл хийсэн гэх нотолгоо байхгүй учраас Х.Клинтонд хариуцлага тооцох шаардлагагүй” гэж ХМТ-ны захирал үзсэн байна.
Х.Клинтонд хэрэг үүсгэх эсэх талаарх эцсийн шийдвэрийг Хуульзүйн яам гаргах аж. АНУ-ын Ерөнхий прокурор, хатагтай Лоретта Линч өнгөрсөн долоо хоногт мэдэгдэхдээ “би ХМТ-ны дүгнэлтийг хүлээн авах болно” гэж байсан билээ.
Г.Доржханд
