Ulaanbaatar
"Эрдмийн мандал" цэцэрлэгт хүрээлэнгийн бүтээн байгуулалт үргэлжилж байна
ОРОН НУТГИЙН МЭДЭЭ | ДУНДГОВЬ
Дундговь /МОНЦАМЭ/. Дундговь аймгийн 10 жилийн нэгдүгээр сургууль буюу
одоогийн нэршлээр “Эрдмийн далай” цогцолбор сургуулийг 1998 онд төгссөн
төгсөгчдийн холбооноос санаачлан сургуулийнхаа хашаанд "Эрдмийн мандал" цэцэрлэгт
хүрээлэн байгуулж байна.
Энэхүү бүтээн байгуулалтын ажил дуусах
дөхөж байгаа ба тус холбооны гишүүд, сургуулийн багш ажилчид, ЗДТГ-т ажиллаж
байгаа үе үеийн төгсөгчид хамтран Эрдмийн мандалд мод тарих ажлыг гүйцэтгэж
байна.
Өчигдрийн байдлаар төгсөгчид 20 гаруй машин шороо чулуу зөөж хөрсийг сайжруулан, 150 орчим модны нүх ухаж, хайлаас, улиас, монос,
буйлс, тоорой, алимны мод суулгалаа.
1998 онд сургууль төгсөгчдийн холбоо тухайн жилд 10
дугаар анги төгссөн 21 бүлгийн 700 орчим гишүүнтэй бөгөөд 2018 онд төгсөлтийн 20
жилийн ойгоор ийнхүү “Эрдмийн мандал” цэцэрлэгт хүрээлэн байгуулахаар
шийдвэрлэж, гишүүд дэмжигчдээс хандивын аян өрнүүлж, “Дундговь сайхан нутаг” хандивын тоглолт зохион байгуулж байжээ.
Энэхүү цэцэрлэгт хүрээлэн нь сургуулийн орчныг тохижуулж,
хүүхэд багачуудад танин мэдэхүйн орчин бүрдүүлэх, аймгийнхаа ногоон
байгууламжийг нэмэгдүүлэхэд хувь нэмрээ оруулах зорилготойг зохион
байгуулагчдын зүгээс онцолж байлаа.
