Ulaanbaatar
Брунейн хун тайж Файк Жефри Болки шигшээ багтаа багтсангүй
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Английн “Арсенал”, “Челси”, “Соутхэмтон”, “Лестер сити” клубүүдийн академид тоглож байсан Брунейн хун тайж Файк Жефри Болки шигшээ багийнхаа БНХАУ-д хийсэн хамтарсан бэлтгэлд очоогүй бөгөөд сүүлийн 23 тоглогч дунд нэр нь багтаагүй байна.
2022 оны ДАШТ, 2023 оны ААШТ-ий урьдчилсан шатны эрхийн
төлөө Монголын шигшээтэй тоглох Бруней Даруссалам Улсын баг өчигдөр /2019.06.04/
үдэш 23 цагт Улаанбаатар хотод иржээ.
Нидерланд улсын иргэншилтэй Робби Сервайс хэмээх залуу
дасгалжуулагч тавдугаар сарын 13-нд Брунейн шигшээ багийн ахлах
дасгалжуулагчаар томилогдож, сар хүрэхгүйн хугацаанд тус багтай ажилласан
бөгөөд маргааш том сорилт болох анхны тоглолтоо Улаанбаатарт хийх гэж байна.
Сингапурын дээд лигийг нэг ч хожигдолгүй тэргүүлж буй
Бруней ДПММ /Brunei DPMM FC/ клубийн ихэнх тоглогчид шигшээ багтаа хүчин
зүтгэнэ гэж байсан ч эсрэгээрээ хоёроос гурван тоглогч л Монголын эсрэг
тоглохоор дуудагджээ.
Брунейн Даруссалам улсын шигшээ 2018 оны ДАШТ-ий урьдчилсан шатны эрхийн төлөө Тайваньтай тоглож талбайд нь 0:1-ээр хожсон ч өөрийн талбайдаа 0:2-оор хожигдож нийлбэр дүнгээр урьдчилсан шатанд багтаж чадаагүй юм. Мөн 2015 онд Монголын шигшээ багийг хоёр тоглолтод хожсон Зүүн Тиморыг 2018 оны “Сузуки цом”-ын хүрээнд талбайдаа 1:0-ээр хожсон нь манай багийн хувьд хүчтэй өрсөлдөгч гэж болно.
Дэлхийн чансааны 187 дугаар байрт бичигдэж байгаа
манай шигшээ баг энэ сарын 6-нд 17 цагаас 194 дүгээр байрын Брунейн багтай эх орондоо тоглох тулааныг манай үзэгч хөгжөөн дэмжигчид хүрэлцэн
ирж, хожлын төлөө багаа дэмжээрэй.
