Ulaanbaatar
Чөлөөт бөхийн залуучууд ДЗАШТ-ээс 2 мөнгө, 2 хүрэл медаль хүртжээ
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Бөхийн төрлүүдийн 2018 оны дэлхийн залуучуудын аварга шалгаруулах тэмцээн /ДЗАШТ/ есдүгээр сарын 17-23-нд Словакийн Трнава хотноо болж манай баг тамирчдаас эмэгтэй бөхчүүд 2 мөнгө, нэг хүрэл, эрэгтэйчүүд ганц хүрэл медаль хүртлээ.
ДЗАШТ-ий сүүлийн өдөр эрэгтэйчүүдийн 74 кг-д 2018 оны залуучуудын Ази тивийн АШТ-ий мөнгөн медальт, өсвөр үе, залуучуудын улсын аварга Орхон аймгийн “Ирээдүйн одод” сургуулийн тамирчин, спортын мастер Б.Бат-Эрдэнэ хүрэл медалийн эзэн болов. Тэрбээр Трнавагаас манай эрэгтэй бөхчүүдээс цорын ганц медалийг эх орондоо авчирлаа.
Энэ жинд залуучуудын ДАШТ-ээс авч буй гурав дахь медаль юм. Өмнө нь үндэсний бөхийн улсын гарьд, чөлөөт бөхийн ОУХМ Д.Баяраа агсан 1979 онд Улаанбаатарт, ОУХМ Б.Нямбаяр 2012 онд Тайландаас хүрэл медаль хүртэж байлаа. Б.Бат-Эрдэнэ эхний даваанд гоц мөргөж, 1/8 шигшээд Казахстаны Айбар Жылкайдаровыг оноогоор цэвэр (10:0), шөвгийн наймд залуучуудын ЕАШТ-ий мөнгө, хүрэл медальт Болгарын Жемал Рушен Алиг 6:2-оор ялсан ч хагас шигшээд АНУ-ын Кевин Льюист оноогоор цэвэр (1:12) ялагдсан. Харин хүрэл медалийн төлөөх барилдаанд Эстонийн Эрик Рейнбокийг оноогоор цэвэр (12:1) ялсан байна.
Түүний багш Орхон аймгийн “Ирээдүйн одод” сургуулийн дасгалжуулагч, ОУХМ Б.Идэрсайхан юм. Тэрбээр Словакт гурван шавьтайгаа очиж, хоёр нь мөнгө, хүрэл медаль хүртжээ.
“Трнава-2018” ДЗАШТ-ий 4 дэх өдөр эмэгтэйчүүдийн 65 кг-д Э.Дэлгэрмаа мөнгөн медаль хүртсэн бол
өмнө нь Б.Халиунаа /Орхон/ 55 кг-д мөнгө, Б.Энхцэцэг хүрэл медалийн эзэн болсон юм.
