Ulaanbaatar
Өрхийн нэгдсэн санд бүртгүүлснээр хүүхдийн мөнгөө авах нь
МОНГОЛЫН МЭДЭЭХүүхдийн мөнгийг түвшин харгалзахгүй олгох болсон ч өрхийн мэдээллийн санд заавал бүртгүүлсэн байх шаардлага тавьж байна.
Өнгөрөгч баасан гарагийн УИХ-ын чуулганы нэгдсэн хуралдаанаар хүүхдийн мөнгийг ялгавартай олгох зохицуулалтыг хүчингүй болгож, хүүхэд бүрт олгохоор шийдвэрлэсэн. Энэ дагуу хүүхдийн мөнгийг хэвийн олгох болсон ч өрхийн мэдээллийн нэгдсэн санд бүртгэлтэй эсэхийг харгалзаж, хэрэв амжаагүй бол санд бүртгүүлж, баталгаажуулсаны дараа 20 мянган төгрөг олгох болж байгаа аж. Гэхдээ өрхийн мэдээллийн нэгдсэн сан дахь бүртгэл нь баталгаажаагүй ч өргөдөл гаргасан сараас нь тооцож, мөнгийг нь олгоно. Өөрөөр хэлбэл, иргэн өрхийн амьжиргааны нэгдсэн санд бүртгүүлэхээр харьяа сум, хорооныхоо халамжийн ажилтанд хандаж өргөдөл гаргасан хугацаанаас эхэлж хүүхдийн мөнгийг нь тооцон олгох юм. Учир нь иргэдийн өргөдлийг хүлээн авсан ч ачаалал ихтэйгээс үүдэн халамжийн ажилтнууд өрхөөр явж дахин судалгаа хийх, түүнийгээ баталгаажуулахад багагүй хугацаа шаардагдаж байгаа аж. Хэрэв иргэн 2 дугаар сарын 1-нд өрхийн амьжиргааны түвшин тогтоолгох хүсэлт гаргасан бол нэгдүгээр сарын мөнгийг нөхөж олгох боломжгүй аж.
Мөн үүнээс гадна өрхийн мэдээллийн санд бүртгүүлээгүй ч хүүхэд бүрт 20 мянган төгрөг авах эрх нь нээлттэй байна.
Тогтоолд өөрчлөлт оруулах гэж байгаатай холбоотой өнгөрөгч оны сүүлийн сарын Хүүхдийн мөнгө хоцорсон ч орсон. Харин энэ сарын хувьд 31-нийг хүртэлх хугацаанд бүртгэлд хамрах хүсэлтээ ирүүлсэн иргэдийн мэдээллийг дотоод нөөц бололцоогоо ашиглан албажуулж, ирэх сарын 5 гэхэд нэгдүгээр сарын Хүүхдийн мөнгийг олгохоор ажиллаж байгаа аж.
Дашрамд дурдахад энэ оны төсөвт тусгасан мөнгө нь наймдугаар сар хүртэл хүүхдийн мөнгийг олгоход хүрэлцээтэй бөгөөд үүнээс цааш үргэлжлүүлэн олгоход 70-80 тэрбум төгрөгийг төсвийн тодотголоор батлуулах шаардлагатай болоод байгаа аж.
Н.Туяа
