Ulaanbaatar
Венесуэлийн агаарын орон зай бүрэн хаагдсаныг Д.Трамп анхааруулжээ
ДЭЛХИЙН МЭДЭЭ | УЛС ТӨР
ВАШИНГТОН, 2025 оны арваннэгдүгээр сарын 30 /DW/. Венесуэлийн агаарын орон зай ба түүний ойр орчмын бүс бүрэн хаагдсан гэж үзэх хэрэгтэй хэмээн АНУ-ын Ерөнхийлөгч Д.Трамп өөрийн Truth Social нийгмийн сүлжээндээ бямба гарагт бичжээ.
“Агаарын тээврийн бүх компани, нисгэгчид,
хар тамхины наймаачид ба хүний наймаачдад хандаж хэлэхэд: Венесуэлийн агаарын
орон зай ба түүний ойр орчмын бүс бүрэн хаагдсан гэдгийг анхаарна уу” хэмээн Трампын нийтэлсэн
постод дурдсан байна.
Энэ мэдээг нийтлэх мөчид нислэгийн
хөдөлгөөнийг хянадаг Flightradar24 цахим хуудасны мэдээллийг харвал, агаарын
хөлгүүд Венесуэлийн агаарын орон зай
дээгүүр нисэхгүй байна.
Энэ сарын 22-ны өдөр АНУ-ын
Холбооны иргэний агаарын удирдах газраас /FAA/ томоохон авиа компаниудад хандан
“Венесуэлийн дээгүүр нисэх үед аюултай нөхцөл байдал үүсэж магадгүй” гэдгийг
анхааруулжээ.
Сүүлийн хэдэн сарын турш АНУ Карибын тэнгис дэх цэргийн оролцоогоо эрс нэмэгдүүлж, нисэх онгоц тээгч USS Gerald R хөлөг онгоц болон байлдааны 8 хөлөг онгоц, F-35 сөнөөгч онгоцуудаа илгээсэн байна. Түүнээс гадна, Америкийн агаарын цэргийн хүчин есдүгээр сараас хойш Карибын тэнгис болон Номхон далайн зүүн хэсэгт явж байсан 20 гаруй хөлөг онгоцонд цохилт өгснөөр 80 гаруй хүн амиа алджээ. Трампын засаг захиргааны үзэж байгаагаар, эдгээр хөлөг онгоц нь Венесуэлийн эрх баригчдын ивээл дор АНУ руу мансууруулах бодис тээвэрлэж байжээ.
2020 онд буюу Д.Трамп анх
ерөнхийлөгч болох үед АНУ-ын засаг захиргаанаас Мадуро болон Венесуэлийн өндөр
албан тушаалтнуудыг “наркотерроризм” үйлдэж байна хэмээн буруутгаад, Мадурог барьж
өгсөн тохиолдолд 15 сая долларын шагнал амлаж байв. Шагналын хэмжээ
энэ оны эхээр 25 сая доллар, наймдугаар сард 50 сая доллар болж өсжээ.
Николас Мадуро нь Cártel de los
Soles /Нарны картель/ гэдэг хар тамхи наймаалагч бүлэглэлийг удирдаж, 20 жилийн
хугацаанд олон зуун тонн мансууруулах бодисыг АНУ-д нэвтрүүлсэн гэж АНУ-ын
Хуульзүйн яам буруутгаж байгаа юм.
