Ulaanbaatar
Монголоос Казахстан руу хууль бусаар оруулсан тээврийн хэрэгслүүдийн жагсаалтыг зарлажээ
ОРОН НУТГИЙН МЭДЭЭ | БАЯН-ӨЛГИЙ
Баян-Өлгий /МОНЦАМЭ/. Бүгд Найрамдах Казахстан Улсын Сангийн яамны Улсын орлогын хороо Монгол Улсаас хууль зөрчин оруулж ирсэн 805 тээврийн хэрэгслийн жагсаалтыг зарласныг КазАкпарат агентлаг уламжиллаа.
Тухайн тээврийн хэрэгслүүд нь 2001-2010 онд Өмнөд Солонгос улсад үйлдвэрлэгдсэн HYUNDAI, KIA маркийн авто машинууд бөгөөд тэднийг бүртгүүлэхийн тулд хуурамч гаалийн бичиг баримт бүрдүүлсэн гэжээ.
Дээрх асуудлаар Авто тээврийн үндэсний төвийн Баян-Өлгий аймаг дахь салбараас тодруулахад: "Улсын хэмжээнд Алтанбулаг, Бургастай зэрэг боомтуудаар дамжуулан 12 мянга орчим тээврийн хэрэгсэл Казахстан Улс руу гарсан гэсэн мэдээлэл байна. Цагааннуурын боомтоор гэхэд 4727 тээврийн хэрэгсэл гарч, буцаж орж ирээгүй. Өнгөрсөн жил 42 машин гарсан. Иргэд унаж очсон машинаа тэндээ орхиж, Хятад, Киргиз улсаар дамжин буцаад ирдэг" гэлээ.
Одоо Казахстан Улсад хууль бусаар оруулж ирсэн тээврийн хэрэгслүүдийг саатуулж, гааль болон холбогдох бусад татваруудыг нөхөн төлүүлэх, хууль зөрчсөн иргэн, албан тушаалтнуудад хариуцлага тооцох арга хэмжээ авч байгаа ажээ.
Ө.Нурболат
