Ulaanbaatar
У.Хүрэлсүхийг Ерөнхий сайдаар томилохыг Ерөнхийлөгч дэмжлээ
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Ерөнхийлөгч Х.Баттулга Ерөнхий сайдад нэр дэвшигчийн талаар зөвшилцөх хүсэлтийн хариуг УИХ-ын дарга М.Энхболдод эргүүлэн өгөв.
Ерөнхий сайдаар томилох санал оруулах тухай уг бичгийг УИХ-ын дарга М.Энхболдод Ерөнхийлөгчийн Тамгын газрын дарга З.Энхболд гардуулан өгсөн юм.
Уг хариу албан бичигт “УИХ-ын 2016 оны сонгуулийн дүнгээр байгуулсан Засгийн газрыг огцруулсан тул МАН нь У.Хүрэлсүхийг Ерөнхий сайдад нэр дэвшүүлэн 2017 оны 9 дүгээр сарын 27-ны өдөр Ерөнхийлөгчид өргөн мэдүүллээ.
Үндсэн хуулийн Гучин гуравдугаар зүйлийн 1 дэх хэсгийн 2-т заасан бүрэн эрхийнхээ дагуу У.Хүрэлсүхийг Монгол Улсын Ерөнхий сайдаар томилох саналыг Монгол Улсын Их Хуралд оруулж байна.
У.Хүрэлсүхийг Ерөнхий сайдаар томилох асуудлыг яаралтай хэлэлцэн шийдвэрлэхийг УИХ-аас хүсье” гэжээ.
Б.Туул
Гэрэл зургийг Т.Чимгээ
