Ulaanbaatar
Иргэдээ сонсох 11 11 төвд 700 орчим иргэн ханджээ
МОНГОЛЫН МЭДЭЭ | УЛС ТӨРЗасгийн газрын “1111” төвд иргэдээс энэ сарын 16-21-нд 700 орчим санал иржээ.
Махны эскпортын талаар сонирхсон асуулт олон иржээ. ОХУ-д 26, БНХАУ-д 5 үйлдвэр мах экспортлох зөвшөөрөлтэй байна. Махны экспортыг нэмэгдүүлэх зорилгоор БНХАУ-ын ХХААЯ, Чанарын хяналт шалгалт хорио цээрийн ерөнхий газраас шинжээчдийн багийг урьж, 2 улсын хамтарсан ажлын хэсэг Монгол Улсын баруун бүсийн аймгуудад ажилласан. Баруун аймгуудад шүлхийн хоригийг цуцалснаар үхэр, хонь, ямааны махыг тухайн бүс нутаг дахь үйлдвэрүүдэд бэлтгэн БНХАУ-д экспортлох болно гэсэн хариултыг ХХААЯ-наас өгсөн байна.
Элэгний С вирусийн эмийг хэзээ оруулж ирэх талаар цөөнгүй асуулт ирсэн байна. Эрүүл мэнд, спортын сайдын энэ оны 196 дугаар тушаалаар С вирусийг оношлох, эмчлэх, 98 хувийн эдгэрэлтэй “Харвони” эмийг оруулж ирэх бэлтгэл хийж байна. “Харвони” эмийг энэ оны 5 дугаар сард эмийн бүртгэлд бүртгэсэн. Зах зээл дээр нэг курс нь 94 мянган ам.доллараар борлуулдаг эмийг 1200 доллараар Монголд борлуулах санамж бичиг байгуулсан. Ирэх сарын дундуур оруулж ирнэ. Улсын хэмжээнд Хепатит С вирусийн оношилгоо, эмчилгээний хүрээнд хот хөдөөгийн 140 эмч мэргэжилтнийг хоёр удаагийн сургалтад хамруулж батламжийн дагуу гэрээ хийсэн лабораториудад тодорхой төлбөртэйгээр С вирус тоолох шинжилгээнд хамрууллаа. Элэгний С вирусийн эмийг албан ёсоор сонгосон 22 эмийн сангаар борлуулахаар төлөвлөж байна гэсэн хариултыг Эрүүл мэнд, спортын яамнаас өгчээ.
