Ulaanbaatar
Их шүрэн далангийн шүр улам цайрсаар байна
ДЭЛХИЙН МЭДЭЭ | БАЙГАЛЬ ОРЧИНКАНБЕРРА. /VOA/. Сүүлийн хоёр жил дараалан далайн усны температур нэмэгдэж байгаагийн улмаас Австралийн Их шүрэн даланд шүр цайрах үзэгдэл газар авсаар байна.
Шүр цайрах ийм үзэгдэл хэдэн арван жилийн турш ажиглагдсаар байгаа ажээ. Энэ талаар Квинслэндийн Жеймс Күүкийн их сургуулийн судлаачид өнгөрсөн сард хийсэн судалгааныхаа дүнг даваа гарагт танилцуулсан байна.
Судлаачид Австралийн зүүн хойд эргийн дагуу 2300 км орчим урт зайд сунаж тогтсон далангийн 800 орчим байрлалд судалгаа хийжээ. Судалгааны дүнг харахад, далангийн гуравны хоёр нь, ялангуяа нутгийн зүүн хойд хэсэгт орших Кэйрнзын орчмын 1500 км-т цайралт илүүтэй ажиглагдсан байна.
Өнгөрсөн онд хийсэн судалгаагаар, шүрний цайралт ихэвчлэн хойд нутгаар газар аваад байсан бол харин энэ онд явуулсан судалгаанаас харахад, шүрний цайралт төв хэсэг рүү чиглэн тархаж байгаа нь ажиглагдсан байна.
Зөвхөн өмнөд хэсэг л цайралтанд өртөөгүй байгаа аж.
Дэлхийн дулаарлаас үүдэлтэй далайн усны температур урд өмнө байгаагүйгээр нэмэгдсэний улмаас энэ цайралт үүссэн гэж тус сургуулийн профессор Терри Хагхэс тайлбарлалаа. Далайн усны температур нэмэгдэх явдлыг зогсоохын тулд яаралтай арга хэмжээ авах шаардлагатай гэж тэрбээр онцолсон юм.
Их шүрэн далан нь дэлхий дээрх хамгийн том шүрэн далан бөгөөд Дэлхийн байгалийн өвийн жагсаалтад бүртгэгдсэн байдаг.
Сүүлийн 20 жилийн хугацаанд 4 удаа өргөн хүрээтэй цайралт явагдсан бөгөөд 2016 болон 2017 онд хамгийн сүүлчийн 2 тохиолдол бүртгэгдсэн байна.
Х.Сарнай
