Ulaanbaatar
Туулын хурдны замын зорчих хэсгийн хөдөлгөөнийг 2027 онд нээнэ
МОНГОЛЫН МЭДЭЭ | НИЙГЭМ
Улаанбаатар, 2025 оны арваннэгдүгээр сарын 28 /МОНЦАМЭ/. Туулын хурдны замын нөлөөлөлд өртсөн нэгж талбарыг чөлөөлөх ажил үргэлжилж байна.
НЗДТГ-ын мэдээлснээр, энэ хүрээнд СХД-ийн 32 дугаар хороо, Авто худалдааны цогцолборын урд талд кемп байгуулах байршилд хотын дарга Х.Нямбаатар болон албаныхан ажиллалаа.
Туулын хурдны
зам болон тус замын үерийн байгууламжийн нөлөөлөлд 112 нэгж талбар өртөж, есөн нэгж талбарыг чөлөөлөөд байна.
Энэ үеэр хотын
дарга Х.Нямбаатар, “Баянзүрхийн товчооны авто замаас баруун аймгууд руу салдаг
аюулгүйн тойрог хүртэл үргэлжлэх Туулын хурдны зам нийт зургаан эгнээ, долоон
орц гарцтай 32 км байна. Энэ нь Монгол Улсад огт хийж байгаагүй бүтээн
байгуулалт юм. 2026 оны 3 дугаар сараас бүтээн байгуулалтын ажлаа эхлүүлнэ.
Эхний ээлжид гүүр, хоолой, далангийн ажлыг эхлүүлнэ. Бэлтгэл ажил 90 гаруй
хувьтай үргэлжилж байна. Карьер, хайрга, дайргын ажил дууссан. Мөн кемпүүдээ
байгуулж, техникүүдээ оруулж ирж байгаа. Он гараад ажиллах хүчнийхэн орж ирнэ.
Туулын хурдны зам ашиглалтад орсноор Улаанбаатар хотын авто замын түгжрэл
хамгийн багадаа 15 хувиар буурна гэдгийг инженерүүд тооцоолсон. Үүнээс
гадна Туулын хурдны замын тодорхой байршилд иргэн, ААН-ийн эзэмшиж,
ашиглаж байгаа газар үнэ цэнд орно. Туулын хурдны замын зорчих хэсгийн
хөдөлгөөнийг 2027 оны долоодугаар сарын 1-нд нээхээр төлөвлөж байна”
гэв.
Мөн нэгдүгээр тойрог замын тендерийг ирэх даваа гарагт нээх товтой ажиллаж байсан ч тендерт оролцогч аж ахуйн нэгжүүдийн хүсэлтийн дагуу хугацааг сунгахаар болжээ.
