Ulaanbaatar
ТӨВ: Ерөнхий боловсролын 32 сургуульд 938 багш ажиллана
ОРОН НУТГИЙН МЭДЭЭ | ТӨВ
Зуунмод, 2025 оны наймдугаар сарын 29 /МОНЦАМЭ/. Энэ хичээлийн жилд Төв аймгийн Ерөнхий боловсролын 32 сургууль үйл ажиллагаагаа явуулж, 938 багш ажиллана. Үүнээс 31 нь төрийн өмчийнх юм.
Хичээлийн шинэ жилийг угтан багш нарын бага хурлыг 8 дугаар сарын 27-ны өдөр Зуунмод хотноо зохион байгуулав. Хуралд аймгийн Мэргэжлийн боловсролын политехник коллеж, Ерөнхий боловсролын 32 сургууль, СӨБ-ын 44 цэцэрлэгийн захирал, сургалтын эрхлэгч, менежер, нийгмийн ажилтнууд оролцсон байна.
Төв аймгийн Боловсролын газрын дарга Ц.Нарантуяа: "Хүүхэд хамгааллын бодлого, эрх зүйн орчны талаарх ойлголт, мэдлэгийг дээшлүүлэх, мэргэжлийн удирдлагаар хангах зорилгоор олон сэдвээр сургалт зохион байгуулж байна. Тухайлбал, "Хүүхдэд ээлтэй дотуур байр”, “Сургуулийн соёл-суралцагчийн төлөвшлийг дэмжих үйл ажиллагаа”, Гэмт хэргээс урьдчилан сэргийлэх ажлыг зохицуулах зөвлөл, Боловсролын газар, Хүүхэд гэр бүлийн хөгжил хамгааллын газраас мэргэжилтнүүд мэдээлэл хийж байна" гэв.
Мөн 27 сумын төрийн өмчийн 38, төрийн бус өмчийн 3 цэцэрлэгийн 41 эрхлэгч, 28 арга зүйчид хүүхдийн тэгш хамран сургалт, хоол үйлдвэрлэл үйлчилгээнд анхаарах асуудал, сайн дурын ажилтны хамтын ажиллагаа, СӨБ-ын сургалтын шинэчилсэн хөтөлбөрийг хэрэгжүүлэх зэрэг сэдвүүдээр аймгийн Боловсролын газраас сургалт хийлээ.
